«Ámire» fılminiń alǵashqy kórsetilimi qashan ótedi
ASTANA. QazAqparat - Áıgili ánshi Ámire Qashaýbaev týraly fılmniń alǵashqy kórsetilimi qashan ótetini belgili boldy, dep habarlaıdy «QazAqparat» HAA tilshisi.
«Qazaqfılm» kınostýdııasynyń baspasóz qyzmetiniń habarlaýynsha, Almaty qalasynda fılmniń kórsetilimi aldaǵy sáýir aıynyń 3-i kúni saǵat 19:00-de «Kinopark 11 (Esentaı) IMAX 3D» kınoteatrynda ótedi.
Al QR Mádenıet jáne sport mınıstrliginiń baspasóz qyzmeti Astanada atalmysh kınotýyndynyń alǵashqy kórsetilimi 2 sáýir kúni saǵat 19:0-de «Saryarqa» kınoteatrynda bolatynyn habarlaýda.
Eki megapolıstegi tusaýkeser kórsetilimderden keıin otandyq týyndy 5 sáýir kúni Qazaqstannyń barlyq kınoteatrlarynda prokatqa shyǵady.
Aıta keteıik, kórkem fılmdi Mádenıet jáne sport mınıstrliginiń tapsyrysy boıynsha Sh.Aımanov atyndaǵy «Qazaqfılm» AQ jáne Álıdar Ótemuratovtyń «Dar Play» kompanııasy birlese túsirgen.
Buǵan deıin kartınany túsirý jumystary aıaqtalyp, onyń treıleri shyqqanyn jazǵan bolatynbyz.
Halyqaralyq túsirilim tobynyń quramynda: amerıkalyq qoıýshy-rejısser Djef Vespa (Jeff Vespa), operator - Maksım Osadchıı («9 rota», «Stalıngrad») bar.
Fılmniń stsenarııin jazǵan Benjamın A. van der Vın (Benjamin A. van der Veen).
Basty rólderdi otandyq akterler Sanjar Mádıev pen Erkebulan Daıyrov somdaıdy.
Kınotýyndy qazaqtyń tuńǵysh dramalyq tenor daýysty birtýar ánshisi Ámire Qashaýbaevtyń (1888-1934 jj.) qamshynyń sabyndaı ǵana qysqa da, jarqyn ǵumyryn baıandaıdy.
«Ámire» fılmi Parıj aspanyn ánge bólep, kúlli álemdi tamsandyrǵan Ámire Qashaýbaevtyń 130 jyldyǵyna arnalǵan.
