«Ámire» fılmi halyqaralyq kınofestıvalda jeńiske jetti
ASTANA. QazAqparat - Qazaqstandyq «Ámire» fılmi AQSh-tyń Los-Andjeles qalasynda ótken halyqaralyq óner báıgesinde birinshi oryndy jeńip aldy, dep habarlaıdy Habar24kz.
Bul týraly akter Sanjar Mádıev óziniń ınstagramdaǵy paraqshasynda: «Dostar! «Ámire» fılmi Hollywood Film Festival kınofestıvalinde birinshi oryndy jeńip aldy jáne qazylar alqasynyń joǵary baǵasyna ıe boldy», - dep jazdy.
«Jalpy dúnıejúzilik kınematografııada mýzykalyq drama janrynda túsirilgen fılmder kóp emes. Sondyqtan bul janrdaǵy kartınanyń kıno áýesqoılaryna erekshe áser etkeni anyq. Zamanynda Parıjde án shyrqap, kári qurlyqtyń talǵampaz jurtyn tańdaı qaqtyrǵan qazaq tenoryna arnalǵan týyndyny Mádenıet jáne sport mınıstrliginiń tapsyrysy boıynsha «Qazaqfılm» kınostýdııasy men «Darplay» kompanııasy birlesip túsirgen bolatyn»,-dep jazady portal.
