«Ámire» fılmi Fınlıandııa astanasynda kórsetildi

ALMATY. QazAqparat - Qazaqstan Respýblıkasynyń Fınlıandııadaǵy Elshiligi jáne Sh.Aımanov atyndaǵy «Qazaqfılm» AQ uıymdastyrýymen Helsınkı qalasynda rejısser Djeff Vespanyń «Ámire» kórkem fılmi kórsetildi, dep habarlaıdy QazAqparat tilshisi.

QR Mádenıet jáne sport mınıstrligi tapsyrysy boıynsha Sh.Aımanov atyndaǵy «Qazaqfılm» AQ túsirgen bıografııalyq kınotýyndynyń kórsetiliminde Qazaqstannyń Fınlıandııadaǵy tótenshe jáne ókiletti elshisi Janna Sartbaeva bul fılm dúnıejúzi boıynsha adamdardy baılanystyratyn adamzattyń ámbebap tiline aınalǵan mýzyka óneriniń fenomeni týraly ekenin aıtty.

Sonymen qatar, bul keshte fılmde basty róldi somdaǵan akter Sanjar Mádıevtiń vıdeo sálemdemesi kórsetildi.

​​Kesh barysynda AALTO ýnıversıtetiniń stýdenti I.Mızambek dombyramen qazaqtyń kúmbirli kúılerin oryndap berdi.

Sonymen qatar, kesh qonaqtary ulttyq kıimmen sýretke túsip, ulttyq taǵamdardan aýyz tıdi.