«Ámire» fılmi eki birdeı kınofestıvalge qatysyp jatyr
ALMATY. QazAqparat - Qazaqtyń tenor daýysty birtýar ánshici Ámire Qashaýbaevtyń ǵumyryn baıandaıtyn «Ámire» kórkem fılmi mamyr aıynda eki birdeı festıvalge qatysyp jatyr, dep habarlaıdy QazAqparat.
«Qazaqfılm» kınostýdııasynyń málimetinshe, fılm AQSh-ta 8-26 mamyr aralyǵynda ótip jatqan Washington Jewish Film Festival jáne Ulybrıtanııada 27-30 mamyr aralyǵynda ótetin Carmarthen Bay Film Festival kınofestıvalderin qatysady.
Fılmdi Mádenıet jáne sport mınıstrligi tapsyrysy boıynsha Sh.Aımanov atyndaǵy «Qazaqfılm» AQ jáne Álıdar Ótemuratovtyń «Dar Play» kompanııasymen birlese túsirgen. Kartınanyń rejısseri Djeff Vespa.
Basty rólderdi otandyq akterler Sanjar Mádıev (Ámire) jáne Erkebulan Daıyrov (Mustafa Shoqaı) somdaǵan. Sonymen qatar, «Ebbınga, Mıssýrı shekarasyndaǵy úsh bılbord», «Jeti jarymes» jáne «Robokop» fılmderi arqyly tanylǵan aýstralııalyq aktrısa Ebbı Kornısh (Abbie Cornish) túsken.
«Ámre» fılmi kóptegen halyqaralyq festıvalderge qatysyp jatqanyna, onyń ishinde AQSh pen Ulybrıtanııada kórsetiletinine óte qýanyshtymyn. Fılm kópshiliktiń kóńilderinen shyǵyp jatyr, ony kórermenderdiń áserinen birden baıqaýǵa bolady. Sondyqtan da, Ámireniń ǵajap daýysyn búkil álem estýi kerek dep oılaımyn», - dedi fılmniń rejısseri Djeff Vespa.
Aıta ketsek, byltyr «Ámire» fılmi birqatar halyqaralyq kınofestıvalderge qatysyp, bedeldi nagradalarǵa ıe boldy.
Atap aıtsaq, bul fılm Los-Andjeleste ótken Hollywood Film Festival festıvalinde «Silver Screen Prize» jáne «Global Grand Jury Prize» syılyqtarymen, sondaı-aq Ulybrıtanııada ótken Manchester International Film Festival festıvalinde «Úzdik qoıýshy sýretshi» jáne AQSh-ta ótken WorldFest Houston festıvalinde REMI Platinum award júldesimen marapattaldy.
Sondaı-aq jaqynda ǵana «Ámire» fılmi Richmond International Film & Music Festival kınofestıvalinde eki birdeı júldege ıe boldy: «Úzdik oqıǵaly fılm» jáne fılmde basty róldi somdaǵan Sanjar Mádı «Úzdik akter».
