Ámire Árin: Elbasy maqalasy - ordaly eńbekteriniń tabıǵı jalǵasy
TALDYQORǴAN. QazAqparat - «Jetisý» gazetiniń bas redaktory Ámire Árinniń pikirinshe, jurtshylyq qyzý talqylaýǵa kirisken bul maqala Nursultan Nazarbaevtyń osyǵan deıingi oıy ordaly eńbekteriniń tabıǵı túrdegi jalǵasy, dep habarlaıdy QazAqparat tilshisi.
Bastan keship jatqan ómir salty, turmystyq jaıttarǵa tán túıitkildi qaǵıdattardy qaıtalaı eske salǵany qandaı oryndy.
«Qazirgi qoǵamda shynaıy mádenıettiń belgisi - orynsyz sán-saltanat emes. Kerisinshe, ustamdylyq, qanaǵatshyldyq pen qarapaıymdylyq, únemshildik pen oryndy paıdalaný kórgendilikti kórsetedi» - dep atap kórsetilgen.
Qarap otyrsańyz, dál osy kezeńde aýylda da, qalada da halyqtyń turmystyq hal-ahýaly salystyrmaly túrde alǵanda burynǵydan kóp artqan, deıdi Ámire Árin. Sharýanyń yńǵaıyn taýyp, mańdaı terin tóge bilgen jannyń otbasy da, ózi de mereıli. Desek te, bar eken dep shasha berýdi, astatók as, toılardy ótkerýdi adamı artyqshylyq dep qabyldaý uǵymynyń joǵarydan tómen bel alyp otyrýy qynjyltady-aq. Naryqtyq qatynastar qanshalyqty ysyrapshyldyqtyń jolyn keskenimen bul ǵadetten arylǵymyz joq. Bárinen de munyń keıingi tolqynǵa juǵysty bolyp bara jatqandyǵy jýrnalıstiń de janyna batady.
Bas redaktordyń pikirinshe, Nursultan Nazarbaev taıaý jyldarǵy mindetterdiń bastysy retinde qazaq tilin birtindep latyn álipbıine kóshirýdi á degendegi josparǵa tán alǵa tartty.
«Bizdiń eramyzdyń tórtinshi ǵasyrynyń sońynda-aq kári qurlyqty tulpar tuıaǵynyń shańyna bólegen ǵun-túrikterdiń tildik ekspansııasynyń basym túskeni bar. Keıingi Býmyn babamyz qurǵan Túrki qaǵanaty qanatyn jaıǵan tusta bul úrdis tipten etek aldy. Sol sebepti de, latyn, aǵylshyn, german, parsy, slavıan tilderinde túrki tilinen engen sózder jeterlik. Bir myń jyldan astam ýaqyt boıyna Eýrazııa qurlyǵynda halyqaralyq til, ıaǵnı búgingi aǵylshyn tiliniń rólin atqarǵan túrki-qazaq tiliniń aıbyny óz sátinde qalaısha asqaqtamasyn. Qazaqstan halqyn birtutastyqqa alyp keletin latyn álipbıine ótýimiz órisimizdi keńeıtip, álemdik qaýymdastyqtaǵy bet-álpetimizdiń odan ári ajarlana túsýine serpin bereri sózsiz. Onyń ústine jumyr jerdegi elderdiń seksen paıyzy erkin paıdalanyp otyrǵan álipbıden búgin qalys qalsaq, erteń bizdi óskeleń urpaq túsinbeı qalary haq», deıdi «Jetisý» gazetiniń bas redaktory.
