Ámir Súleımenov: enbek.kz saıtynda 45 myń bos oryn bar

ASTANA. QazAqparat - 2018 jyly elektrondyq eńbek bırjasy arqyly 380 myń qazaqstandyq turaqty jumys ornyn tapty. Bul týraly Halyqaralyq aqparattyq tehnologııalar mektebiniń basshysy Ámir Súleımenov málim etti, dep habarlaıdy QazAqparat tilshisi.

«Eńbek jáne halyqty áleýmettik qorǵaý mınıstrligi enbek.kz elektrondyq eńbek bırjasyn iske qosty. Onda HeadHunter, Rabota.nur.kz, market.kz, rabota.kz  jáne basqa da Qazaqstandaǵy iri elektrondyq onlaın-bırjalary bar. Sondaı-aq, enbek.kz saıtynda jumysqa ornalastyratyn 50 jeke agenttiktiń aqparattary bar. Sonyń arqasynda enbek.kz Qazaqstandaǵy iri elektrondyq eńbek bırjasyna aınaldy. Qazirgi tańda saıtta 45 myń bos jumys orny usynylyp otyr jáne 364 myń jumys izdeýshi tirkelgen», - dedi Á.Súleımenov.

Onyń aıtýynsha, enbek.kz saıtyna elektrondyq tsıfrlyq qoltańbanyń kómegimen tirkelgennen keıin, qoldanýshy bos jumys ornyn ońaı jarııalaı alady nemese kerisinshe, túıindemesin tirkeı alady. Qyzmetterdi óńirge, mamandyqqa jáne basqa da qaǵıdalar boıynsha izdeýge  bolady. Sondaı-aq, múmkindigi shekteýli jandar jáne jastar úshin jumys oryndary bar. Saıttyń arqasynda 2018 jyly 380 myń qazaqstandyq turaqty jumys oryndaryn tapty.