Amır, Safııa, Hadııa: Túrkistan oblysynda úshem dúnıege keldi

TÚRKІSTAN. KAZINFORM – Saýran aýdanyna qarasty Oranǵaı aýylyndaǵy Israılovtar otbasynda úshem – bir ul jáne eki qyz dúnıege keldi. 

Buǵan deıin bes ul tárbıelep otyrǵan shańyraqtyń qýanyshy eselenip, otbasy jańa múshelermen tolyqty. Sábılerge Amır, Safııa jáne Hadııa esimderi berildi.

Aýdan ákiminiń orynbasary Baqytjan Býkebaev jáne zııaly qaýym ókilderi jas ananyń jaǵdaıyn bilip, sábılerge arnalǵan syı-sııapattaryn tabystady.

– Úshemniń dúnıege kelýi – aýdanymyz úshin úlken qýanysh. Jańa ómir esigin ashqan bóbekterge uzaq ǵumyr, myqty densaýlyq tileımiz. Olar ata-anasynyń úmitin aqtap, týǵan eline adal qyzmet etetin azamattar bolyp óssin, - dedi Baqytjan Býkebaev.

Aıta keteıik, budan buryn úshemderi bar otbasylar qaı óńirlerde kóp tirkelgenin jazǵan bolatynbyz.