«Amir Capital» isi: 10 mln dollardan astam aktıv buǵattaldy

ASTANA. KAZINFORM – QMA Almaty qalasy boıynsha departamenti «Amir Capital» qarjy pıramıdasyn qurý jáne ony basqarý faktisi boıynsha tergeý júrgizip jatyr. 

— Ózin halyqaralyq ınvestıtsııalyq qor retinde tanystyrǵan «Amir Capital» kompanııasy úsh jyl boıy Qazaqstan, Belarýs, Reseı jáne Qyrǵyzstan azamattarynan krıptovalıýta saýdasy, maınıng jáne túrli jobalarǵa ınvestıtsııalaý arqyly 5–10% mólsherde tabys tabý ýádesimen qarjy tartqan.

Investorlar kompanııanyń resmı saıty arqyly joldanǵan referaldy silteme boıynsha tirkelgen. Jeke kabınetterdi toltyrý krıptovalıýta túrinde (USDT, BTC, ETH) Amir Wallet ámııany arqyly júzege asqan, — delingen habarlamada.

Túsken qarajat qarjy pıramıdasynyń prıntsıpi boıynsha bólinip otyrǵan ıaǵnı, buryn tirkelgen qatysýshylarǵa tólemder keıingi salymshylardyń qarjysy esebinen tólengen.

Nátıjesinde atalǵan pıramıdaǵa 40-tan astam adam tartylǵan.

— 2021 jyldyń sońynda salymshylardyń «amir.capital» platformasyndaǵy jeke kabınetterinen qarajat shyǵarý múmkindigi shektelgen. Uıymdastyrýshylar bul jaǵdaıdy tehnıkalyq aqaýlarmen túsindirip, tólemderdi qaıta bastaýǵa ýáde bergenimen, qarajatqa qol jetkizý múmkindigi qalpyna keltirilmegen, — delingen QMA habarlamasynda.

Quny 10 mln AQSh dollarynan asatyn krıptoaktıvter men Almaty oblysyndaǵy jer telimin buǵattaýǵa sot sanktsııasy alyndy.

Kúdiktilerdiń biri 2 aıǵa qamaýǵa alyndy.

Tergeý jalǵasyp jatyr.

Qylmystyq-protsestik kodeksiniń 201-babyna sáıkes ózge aqparat jarııalaýǵa jatpaıdy. 

Aıta ketelik Shymkent qalasy boıynsha QMA «Mooni Gold» qarjy pıramıdasynyń zańsyz áreketin áshkerelegen edi.