Amır, Amın, Aısha: Aqtóbede úshem dúnıege keldi
AQTÓBE. KAZINFORM — Rasýl men Polına Samatovtardyń otbasynda qýanyshty jańalyq — úshem dúnıege keldi. Náresteler perzenthanadan shyǵaryldy. Bul týraly oblys ákimdiginiń baspasóz qyzmeti málimdedi.
Aqtóbe medıtsınalyq ortalyǵynyń mamandary 30 mamyr kúni Amır, Amın jáne Aıshanyń dúnıege kelýine sebepker boldy.
Medıtsınalyq ýnıversıtet kafedrasynyń professory Svetlana Shıkanovanyń aıtýynsha, statıstıka boıynsha úshemge júkti bolý — sırek kezdesetin jaǵdaı, ásirese EKO tehnologııalarynsyz.
— Polınanyń otbasynda kópbalaly júktilikke tuqym qýalaıtyn beıimdilik bar. Júktilik pen bosaný kezeńi sátti ótti. Úsh sábı qanaǵattanarlyq jaǵdaıda úıge shyǵarylyp jatyr, — dedi sarapshy.
Rasýl men Polınanyń ata-ana retindegi tájirıbesi mol. Búgingi perzenthanadan shyǵarý saltanatyna úshemniń ápkesi, bes jasar Daıana men úsh jastaǵy aǵasy Islam da qatysty.
Jas otbasyn qýanyshymen oblystyq Densaýlyq saqtaý basqarmasynyń ókilderi jáne Aqtóbe qalasy Astana aýdanynyń ákimi quttyqtady.
Aıta keteıik, jyl basynan beri óńirde 5255 sábı dúnıege kelgen. Onyń ishinde 51-i egizder, al ekeýi úshem.
Qazir óńirdegi perzenthanalar qajetti medıtsınalyq qural-jabdyqtarmen tolyq qamtamasyz etilgen. Júktilik, bosaný jáne bosanǵannan keıingi kezeńde áıelderge medıtsınalyq kómek kórsetý úshin barlyq jaǵdaı jasalǵan.
Buǵan deıin Almaty qalasy Qoǵamdyq densaýlyq saqtaý basqarmasynyń Qalalyq perınataldyq ortalyǵynda dúnıege úshem kelgenin jazǵan edik.