Amfan tsıklony saldarynan Úndistan men Bangladeshte 14 adam qaza tapty
DAKKA. QazAqparat – Úndistannyń shyǵysy men Bangladeshte bolǵan qýatty tsıklonnan týyndaǵan sý tasqyny jaǵaǵa jaqyn aýdandarda júzdegen úılerdi qıratyp, apat saldarynan kem degende 14 adam qaza tapty, dep habarlaıdy QazAqparat ABC News-ke cilteme jasap.
Osy aptada eki eldiń 3 mıllıonǵa jýyq turǵyny qaýipsiz jerge kóshirildi. Meteorologtardyń habarlamasy boıynsha, Amfan - sońǵy jyldary aımaqta bolǵan eń qýatty tsıklondardyń biri.
Adamdardy qutqaryp, olardyń múligin saqtap qalý is-qımyldaryn koronavırýstyń taralýyna qarsy kúrestiń júrgizilýi edáýir qıyndyq keltirip otyr.
Tsıklon saǵatyna 185 shaqyrymǵa deıin jetetin ekpindi jelmen birge Úndistannyń Batys Bengalııa shtatyn basyp ótip, odan keıin Bangladeshti japyryp ótken. Munda eki adam qulaǵan aǵashtyń astynda qalyp, qaza tapty.
Daýyl saldarynan Batys Bengalııanyń astanasy Kalkýttada kólikter aýdarylyp, birneshe aǵashtar men elektr symdarynyń baǵanalary qulaǵan.
Batys Bengalııanyń bas mınıstri Mamata Banerdjı shtatta kem degende 10 adam qaza taýyp, eki aýdannyń zardap shekkenin málim etti.
Bangladeshtiń Noahalı aýdanynda sý tasqyny saldarynan 500-den astam úı qırady.
Eske sala ketsek, 2007 jyly Bangladeshte Sıdr tsıklony bolyp, saldarynan 3500-ǵa jýyq adam mert bolǵan edi. Al 1999 jyly Úndistannyń Odısha shtatynda Amfanǵa uqsas sýpertsıklon 10 myńnan astam adamnyń ómirin qıyp áketti.
Avtor: Raýshan Konyrbaeva
