Amerıkanyń Qazaqstandaǵy Elshisi AQSh Prezıdenti B.Obamanyń Astana Sammıtine qatyspaıtyndyǵyn qýattady
ASTANA. 23 qarasha. QazAqparat /Gúlmıra Álıakparova/ - Amerıka Qurama Shtattarynyń Qazaqstandaǵy elshisi Rıchard Hoýgland AQSh Prezıdenti Barak Obama Astanadaǵy EQYU sammıtine qatyspaıtyndyǵyn qýattady.
R.Hoýgland búgin jýrnalısterdiń suraqtaryna jaýap bere kele, AQSh Prezıdenti Barak Obama 1,2 jeltoqsan kúnderi Astanada ótetin EQYU-ǵa múshe memleketter basshylarynyń sammıtine qatyspaıtyndyǵyn rastap, amerıkandyqtardyń resmı delegatsııasyn Qazaqstannyń bas qalasyna Memlekettik hatshy Hıları Klınton bastap keletindigin málim etti.
«Oǵan memlekettik hatshynyń orynbasarlary, Amerıkanyń memlekettik qurylymdarynyń, Kongress músheleri men memlekettik organdardyń sarapshylary men mamandary, barlyǵy 200-ge tarta resmı tulǵa ilesip keledi. Men muny sammıtke qatysýdan bas tartý dep aıtpas edim. Bul jumys kestesimen baılanysty. Prezıdent B.Obama men Prezıdent N.Nazarbaev ózara tyǵyz baılanystardy qoldap otyrǵanyna sendirgim keledi», - dedi Elshi.
