Amerıkanyń 25 shtaty Tramp ákimshiligin jańa tarıfterge baılanysty sotqa berdi
ASTANA. KAZINFORM — AQSh-tyń demokrattar basqaratyn 25 shtatynan quralǵan koalıtsııa prezıdent Donald Tramptyń ákimshiligin ımporttyq taýarlarǵa engizilgen jańa tarıfterge baılanysty sotqa berdi, dep habarlaıdy Report.
Shtattar AQSh-tyń 60 saýda seriktesinen keletin taýarlarǵa salynǵan 10% jáne 12,5% kólemindegi baj salyǵyna qarsylyq bildirip otyr. Olardyń málimetinshe, bul tarıfter AQSh ımportynyń 99,4%-yn qamtıdy.
AQSh-tyń Halyqaralyq saýda sotyna berilgen talap-aryzda Tramp ákimshiligi 1974 jylǵy Saýda týraly zańnyń 301-bólimin júzege asyryp «óz ókilettigin asyra paıdalandy» dep kórsetilgen. Óıtkeni buǵan deıin osyndaı sharalardy sottar zańsyz dep tanyǵan bolatyn.
Shtattar sottan jańa tarıfterdi zańsyz dep tanýdy, olardyń kúshin joıýdy jáne osy ýaqytqa deıin tólengen baj salyǵyn qaıtarýdy talap etip otyr.
— Joǵarǵy sottaǵy jeńilisten keıin ákimshilik tarıfterdiń jańa kezeńin engizý arqyly otbasylar men kásipkerlerge zańsyz túrde qosymsha salyq salýǵa taǵy da áreket jasap otyr, — dedi Nıý-Iork shtatynyń bas prokýrory Letıtsııa Djeıms.
Aq úı bul aıyptaýlardy joqqa shyǵaryp, AQSh ulttyq saýdany jáne amerıkalyq jumysshylardyń múddesin qorǵaý úshin zańda kózdelgen ókilettikterdi paıdalanyp jatqanyn málimdedi.
Tramp ákimshiligi buǵan deıin jańa tarıfterdi májbúrli eńbek qoldanylyp óndirilgen taýarlardyń AQSh jetkizý tizbegine enýine jol bermeý qajettiligimen túsindirgen edi. Alaıda talapkerler májbúrli eńbek máselesi men ártúrli elderge birdeı tarıf engizýdiń arasynda tikeleı baılanys joq ekenin alǵa tartyp otyr.
Aıta keteıik, AQSh Federaldyq rezerv júıesi bazalyq mólsherlemeni ózgerissiz qaldyrdy.
