Amerıkandyqtar Obama men Hılları Klıntondy qurmet tutady - saýalnama
ASTANA. QazAqparat - Amerıkan qoǵamynda eń qurmetti tulǵa AQSh prezıdenti Barak Obama men eks-memlekettik hatshy Hılları Klınton bolyp shyqty. Amerıkandyq Gallup qoǵamdyq pikir ınstıtýty jeltoqsannyń basynda ótkizgen saýaldama málimetteri osyndaı, dep habarlady RIA Novostı.
Osy saýaldamada Obama sońǵy 7 jyl boıy, al Hılları Klınton 13 jyl boıy birinshi orynǵa ıe bolyp keledi. Klınton 1993 jyldan beri 19 ret birinshi orynǵa shyqqan.
Áleýmettanýshylardyń respondent estigen, oqyǵan jáne tańdanatyn qazirde bar áıel adamnyń esimin ataý jónindegi ótinishine saýaldama suralǵandardyń 12 paıyzy Hılları Klıntondy ataǵan. Ekinshi orynda - tanymal telejúrgizýshi Opra Ýınfrı (8%), úshinshi orynda - pákistandyq quqyq qorǵaýshy Malala ıÝsýfzaı (5%).
Qazirgi zamanǵy tanymal áıelderdiń ondyǵynda AQSh-tyń burynǵy memlekettik hatshysy Kondolıza Raıs, AQSh-tyń birinshi hanymy Mıshel Obama, aktrısa Andjelına Djolı, Alıaskanyń eks-gýbernatory Sara Peılın, Kembrıdj gertsogınıasy Ketrın Mıddlton, AQSh senatory Elızabet Ýorren jáne Djordj kishi-Býshtyń zaıyby Lora Býsh atalǵan.
Al erlerge qatysty aıtar bolsaq, amerıkandyqtar Barak Obamany qurmet tutatyn kórinedi, onyń esimin respondentterdiń 19 paıyzy ataǵan. Odan keıin Rım Papasy Frantsısk (6%) jáne AQSh-tyń eks-prezıdenti Bıll Klınton (3%)tur.
Reıtıngige sondaı-aq dinı jáne qoǵam qaıratkeri Bıll Grem, AQSh-tyń burynǵy prezıdenti Djordj kishi-Býsh, neırohırýrg Ben Karson, brıtandyq fızık-teoretık Stıven Hokıng, Microsoft kompanııasyn qurýshylardyń biri Bıll Geıts, amerıkandyq jýrnalıst Bıll O'Reılı, Izraıl premer-mınıstri Bınıamın Netanıahý kirdi. Tanymal er adamdardyń ondyǵyn Reseı prezıdenti Vladımır Pýtın tuıyqtaǵan - onyń esimin saýal suralǵandardyń 1 paıyzy ataǵan.
