Amerıkandyq qaraqshy bir bankti birneshe ret tonady
ASTANA. Qarashanyń 5-i. QazAqparat - Florıdada bir qaraqshy sońǵy bir jyl ishinde «Bank Atlantic»-ke úsh- tórt ret shabýyl jasaǵan.
Sońǵy qylmys qazannyń 31-inde jasaldy. Tonaýshy bankke kirip kelgende kassırlerdiń biri: «Ol taǵy da keldi», - degen. Kassır birden «dabyl túımesin» basyp úlgeredi. Biraq bul qylmyskerge «aqshany qapshyqqa toǵyt» dep talap etýine kedergi etpeıdi. Talaby oryndalǵannan keıin ol izin sýytyp ta úlgeredi.
Polıtseıler tonaýshynyń óziniń syrtqy kelbetin jasyrýǵa áreket etpeıtinin aıtady. Sonymen qatar, ol kassırge qarý kórsetip qorqytpaıdy da. Árıne, onda qarýdyń bolýy ábden yqtımal.
BAQ-qa belgili bolǵanyndaı, bul adam bankten myńdaǵan dollardy urlap ketken. Alaıda dál qansha soma ekendigi jýrnalısterge habarlanǵan joq.
