Amerıkandyq ǵalymdar qazaq onkologııa qyzmetin joǵary baǵalady
13 sheteldik ǵalym 2 kún boıy Qazaqstandaǵy onkologııa qyzmetin jáne ınstıtýt jumysyn baqylap, otandyq onkologııa qyzmetiniń qurylymy, qaterli isikti erte satysynda anyqtaý baǵdarlamalary jáne tirkeýge qoıý júıesimen tanysty. Qonaqtar skrınıng baǵdarlamalary boıynsha da ózge qalalyq emhanalarda bolyp qaıtty.
Sapar sońynda AQSh-tan kelgen delegatsııany QR Densaýlyq saqtaý jáne áleýmettik damý vıtse-mınıstri Aleksandr Tsoı qabyldap, ekijaqty kelissózder júrgizildi. Nátıjesinde aldaǵy ýaqytta eki el arasynda tyǵyz qarym-qatynas ornap, birikken jobalar iske asyrylatyndyǵy belgili boldy.
UPMC AQSh-taǵy Densaýlyq saqtaý salasyndaǵy úzdik ári kommertsııalyq emes uıym. Bul uıym álemdik medıtsınalyq mekemeler men ortalyqtardyń basyn biriktirgen. Shtatynda 60 000 qyzmetkeri bar. Jalpy 20 aýrýhana qyzmetin ortalyqtandyryp otyr. UPMC naýqastar kútimin jaqsartý men tıimdiligin arttyrý úshin jańa júıelerdi oılap tabýmen aınalysady.
Aıta ketý kerek, amerıkandyq uıym Astana qalasynda Ulttyq ǵylymı onkologııalyq ortalyq qurý jobasy boıynsha Nazarbaev Ýnıversıtetiniń strategııalyq áriptesi sanalady. 2017 jylǵa josparlanǵan joba QR Prezıdenti Nursultan Nazarbaevtyń 2012 jylǵy Joldaýy negizinde júzege aspaq.
«Jalpy UPMC delegatsııasy elimizdiń bas onkology, Onkologııa jáne radıologııa QazǴZI dırektory Qýanysh Nurǵazıevke jáne birqatar onkolog-mamandarǵa alǵys bildirip, otandyq onkologııanyń búgingi deńgeıin joǵary baǵalady. Bizdiń qyzmetimizdegi oń ózgeristerdi atap aıtty. Odan bólek, sheteldik jáne otandyq mamandar eki eldiń onkologııa salasyndaǵy aıyrmashylyqtaryn da sóz etti. Jıyn sońynda bolashaqtaǵy áriptestik máselesi de kún tártibinde qaraldy», - deıdi Qazaq onkologııa jáne radıologııa ǴZI dırektorynyń strategııalyq máseleler boıynsha orynbasary Dáýlet Baıpeıisov.
Resmı málimetterge súıensek, 2015 jyldyń 1 qańtaryndaǵy esep boıynsha Qazaqstanda 150 436 adam onkoaýrýlar boıynsha esepte tur. 2013 jyly bul kórsetkish 146 404 bolǵan edi. Qaterli dertke shaldyqqandar sanynyń kóbeıýi obyrdy alǵashqy satysynda anyqtaý múmkindiginiń artýymen tikeleı baılanysty. Jyl saıyn qaterli isikten 17000 myń adam kóz jumady. Ólim-jitim boıynsha onkologııalyq aýrýlar ekinshi orynda tur.
