Amerıkandyq ǵalymdar erlerdiń qasqalanýynyń sebebin anyqtady
ASTANA. 26 naýryz. QazAqparat - Erlerdiń basy taqyrlanýynyń basty sebebi bas terisinde D2 prostaglandın proteıniniń shamadan tys kóp bolyp, shashtyń ósýin toqtatýy bolyp tabylady, dep habarlaıdy Lenta.rý saıty.
Pensılvanııa ýnıversıtetiniń zertteýshileri osyndaı pikirge keldi. Ǵalymdar adamdardyń jáne tyshqandardyń follıkýldaryn zerttep, tájirıbe jasady. Mamandar aǵzada prostaglandın proteıniniń deńgeıi joǵary zerthanalyq tyshqanardy ósirip shyǵardy. Qorytyndysynda bul jándikterdiń júni óspeı qaldy. Kemirgishterge adamdar shashy otyrǵyzylyp, prostaglandın jibergende de ol osyndaı nátıje berdi.
Bul tájirıbe shash follıkýlderi jasýshylarynda prostaglandın deńgeıi kóp bolý shash óspeı, taqyrlanýǵa soqtyratynyn dáleldedi. Zertteýge basshylyq jasaǵan professor Djordj Kotsarelıs: «Biz er adamdardyń bas terisiniń taqyrlanǵan jerlerindegi teri jasýshalarynda prostaglandın deńgeıi joǵary ekenin anyqtadyq, ol shashtyń ósýine kedergi jasaıdy. Sóıtip, endi biz bastyń taqyrlanýymen qalaı kúresý qajettigin taptyq», - dedi.
Amerıkandyq zertteýshilerdiń ǵylymı jumystarynyń nátıjeleri boıynsha dári jasaý isi qolǵa alyndy. Ǵalymdar shyǵarylatyn preparattardy bas terisine jaǵý bastyń taqyrlanýyn toqtatyp, shashtyń qaıtadan ósýine járdemdesedi degen úmitte. Er adamdardyń kópshiligi orta jastan bastap qasqabasqa aınalady, al 70 jasqa qaraı olardyń kópshiliginde bastyń edáýir qasqalanýy baıqalady.
