Amerıkandyq dıplomat Q.Saýdabaevty B.Obamanyń aldaǵy jasaıtyn málimdemesi týraly habardar etti
ASTANA. 18 jeltoqsan. QazAqparat - Qazaqstannyń Memlekettik hatshysy - Syrtqy ister mınıstri Qanat Saýdabaev 16 jeltoqsanda amerıkan tarabynyń bastamashylyǵymen AQSh Memlekettik hatshysynyń Ońtústik jáne Ortalyq Azııa isteri boıynsha orynbasary Robert Bleıkpen telefon arqyly sóılesti.
AQSh ókili Q.Saýdabaev jáne barsha qazaqstandyqtardy Táýelsizdik kúnimen quttyqtady, dep habarlady Syrtqy ister mınıstrliginiń baspasóz qyzmetinen.
Amerıkandyq dıplomat, AQSh basshylyǵynyń tapsyrmasy boıynsha, strategııalyq seriktesteriniń biri retinde Qazaqstandy AQSh-tyń Aýǵanstan jáne Pákistan boıynsha jańartylǵan strategııasy boıynsha Prezıdent Barak Obamanyń aldaǵy jasaıtyn málimdemesi týraly habardar etti.
Aýǵanstandaǵy ahýal Astanadaǵy EQYU Sammıtiniń basty taqyryptarynyń biri bolǵany barshaǵa aıan. EQYU Sammıtiniń tamasha uıymdastyrylǵanyn jáne tabysty ótkizilgenin atap kórsetken R.Bleık, Aýǵanstandaǵy jaǵdaıdy turaqtandyrý jónindegi qoldaýy úshin Qazaqstanǵa jáne eldiń basshysyna alǵysyn bildirdi.
Q.Saýdabaev óz kezeginde, Strategııada qatar qarastyrylǵan áskerı jáne azamattyq máselelerdiń mańyzdylyǵyn atap kórsetti jáne Aýǵanstandy áleýmettik-ekonomıkalyq saýyqtyrý sharalaryn birtindep arttyrýdyń qajettiligine toqtaldy. Ol sondaı-aq Qazaqstannyń EQYU-daǵy tóraǵalyǵyna, ásirese Astana Sammıtin ótkizýde kórsetken qoldaýy úshin amerıkan tarabyna alǵysyn bildirdi.
Taraptar ekijaqty qarym-qatynastyń qarqyndy damýyna qanaǵattanǵandyq bildirdi jáne yntymaqtastyqty ári qaraı nyǵaıtýǵa úlken negiz bar ekenin aıtyp ótti.
