Amerıkandyq CityDance qazirgi zamanǵy bı ansambli Qazaqstanda óner kórsetedi
ALMATY. Qyrkúıektiń 21-i. QazAqparat /Ádilet Musahaev/ - Amerıkandyq CityDance Ensemble bı toby 20-26-shy qyrkúıek aralyǵynda Almaty men Astana qalalarynda óner kórsetedi. Bul jaıynda búgin arnaıy ótken baspasóz máslıhatynda atalmysh bı tobynyń basshylary málim etti, dep habarlaıdy QazAqparat.
CityDance (SıtıDens) ansambli Kolýmbııa aımaǵyndaǵy Vashıngton qalasynan shyqqan qazirgi zamanǵy bı boıynsha kásibı ujym bolyp tabylady. Onyń bıshileri Djýllıard mektebi, Kırov balet akademııasy jáne álemdik deńgeıdegi ózge de mektepter men kompanııalardyń ókilderi. Kompanııa tek AQSh-ta ǵana emes, sonymen qatar, búkil álem kórermenin tánti etetin «asa áserli ınnovatsııalyq» ónerimen gastroldik saparlarǵa shyǵyp turady.
«Osydan 9 aı buryn ansamblimizdiń admınıstratory Nensı Lıýbı osy týrneni uıydastyraıyq degen oı tastaǵan edi. Biz birneshe qyzyqty nómirden turatyn kontserttik baǵdarlamamyzdy usynamyz jáne ol jurtshylyqtyń kóńilinen shyǵady degen oıdamyz. Sonymen qatar bizde qazaqstandyq áriptesterimizben tájirıbe almasyp, sheber-synyptaryn qoııýǵa múmkindik bolady. Bul biz úshin óte qýanyshty jaǵdaı», deıdi CityDance ansambliniń dırektory Pol Emerson.
Vashıngtonnan kelgen toǵyz kásibı bıshi «maqsattylyq, kúsh jáne yntyzarlyq» uranyn óziniń árbir is-qımylynda kórsete otyryp, amerıkandyq jáne sheteldik horeograftardyń atletıkalyq asa kúrdeli qoıylymdaryn usynbaq.
Bı tobynyń horeografy Krıstofer Morgan qýat, sezim, ázil jáne shyńdalǵan tehnıkany úılestirip, ony ózderiniń ómirge jáne mánerlikke toly qoıylymdarynda pash etetindikterin jetkizdi.
22 qyrkúıek kúni CityDance Almaty opera jáne balet teatrynda óner kórsetse, qyrkúıektiń 25-i kúni Astana kórermenderin Beıbitshilik jáne kelisim saraıynda qarsy almaq.
Týrdyń uıymdastyrýshylary AQSh-tyń Qazaqstandaǵy elshiligi, Qazirgi zamanǵy horeografııa ortalyǵy, Almatydaǵy qazirgi zamanǵy bı festıvali jáne Astananyń beıbitshilik jáne kelisim saraıy bolyp tabylady. Úsh aptaǵa sozylatyn týr sheńberinde CityDance Belarýs pen Reseıde de óner kórsetpek.
