Amerıkan pastory qyrkúıektiń 11-inde Qurandy órteý jónindegi josparynan bas tartqan joq - Sı-bı-es
ASTANA. Qyrkúıektiń 9-y. QazAqparat - Florıdadaǵy protestanttyq shirkeýdiń pastory Terrı Djons jurtshylyqtyń pikirine qulaq aspaı, qyrkúıektiń 11-i kúni Qurandy órteý aktsııasyn báribir júzege asyrýǵa ýáde berip otyr. «Biz solaı istemekpiz, jáne solaı bolady»,- dep málim etti ol Sı-bı-es telearnasyna bergen suhbatynda.
Federaldyq ókimettiń talaptary da, dinbasylar men qoǵam qaıratkerleriniń keńesteri de pastordy raıynan qaıtara almaı otyr. Pastor oılaǵan áreketin jasaıtyn bolsa, onyń sońy tek AQSh-ta ǵana emes, dúnıejúzi boıynsha túrli din ókilderiniń qaqtyǵystaryna ákelýi múmkin, deıdi sarapshylar.
Dove World Outreach Center shirkeýiniń pastorynyń paıymdaýynsha, «Qurandy órteý - ókilderi Qurama Shtattarǵa óz yqpaldaryn júrgizýdi nıet etip otyrǵan ıslamnyń aýyr baǵytyna eskertý bolmaq». «Biz bul áreketimizben, olarǵa Eýropada istegenderińdi bul jerge isteı almaısyńdar degimiz keledi. Bizdiń olarǵa aıtpaǵymyz: Amerıkada turasyńdar ma, sol eldiń zańy men konstıtýtsııasyn saqtańdar, óz múddelerińizdi tyqpalaǵandaryńdy qoıyńdar», - deıdi pastor Djons óz málimdemesinde.
Al eldiń qoǵam qaıratkerleri men saıasatkerleri pastordy raıynan qaıtýǵa shaqyryp otyr. «Qurandy órteý «jaýapsyz, masqara áreket bolyp tabylady». Seısenbi kúni keshke memlekettik departamentte berilgen ıftarǵa qatysqan AQSh Memlekettik hatshysy Hılları Klınton osyndaı málimdeme jasady.
«Jańalyqtarda Geınsıll qalasynyń (Florıda shtaty) pastory qyrkúıektiń 11-inde Qurandy órteýdi josparlap otyrǵany týraly aıtylyp otyrǵanyn estip, biz bir adamdaı bas kóterip otyrmyz. Amerıkadaǵy barlyq din ókilderiniń jetekshileri - hrıstıan-evangelısterden bastap ravvınderge deıin, tipti zııaly qaýym ókilderiniń osynaý jaýapsyz, masqara áreketti aıqyn aıyptaýy maǵan rýh berip otyr», dep atap kórsetti AQSh-tyń memlekettik hatshysy. Klınton hanym sondaı-aq, «AQSh-tyń dinı tózýshilikti ustanatynyn» basa atap kórsetti.
