Amerıkalyqtardyń jartysynan kóbi benzın baǵasyn tómendetý sharalaryn qoldaıdy

BAKÝ. QazAqparat – AQSh-tyń bes saılaýshysynyń úsheýi nemese amerıkalyqtardyń 57%-y benzınniń ishki baǵasyn tómendetý quraly retinde Strategııalyq munaı rezervinen (SPR) qarajat bólýdi qoldaıdy.

Mundaı derekterdi Morning Consult sońǵy zertteýi kórsetti, dep habarlaıdy QazAqparat menshikti tilshisi Oilprice-ǵa silteme jasap.

Saýalnamaǵa sáıkes, demokrattardyń 70%-y jáne respýblıkashylardyń 48%-y munaı rezervinen aqsha bólýdi qoldaıdy.

Baıden ákimshiligi osy jyldyń sońyna deıin strategııalyq munaı rezervinen 180 mıllıon barrel bólmek. Aq úı 8 qarashadaǵy aralyq saılaý qarsańynda mundaı qadamdy benzın baǵasyn tómendetýdiń negizgi quraly retinde qarastyryp otyr.

Sonymen qatar, benzın baǵasyn tómendetýdiń basqa sharalary odan da kóp qoldaý tapty. Mysaly, baǵany kóterýge tyıym salý saılaýshylar arasynda eń tanymal shara, ony barlyq saılaýshylardyń 76%-y maquldady.

Saýalnama sonymen qatar osy sharalardyń ishinde respýblıkashylar AQSh-tyń shıki munaı jetkizilimin ulǵaıtýdy keńinen qoldaıtynyn kórsetti, al demokrattar munaı kompanııalaryna nazar aýdarýdy jaqtaıdy.

Sonymen qatar, ótken aptada Rasmussen Reports júrgizgen sońǵy jalpyulttyq saýalnamaǵa sáıkes, AQSh-taǵy yqtımal saılaýshylardyń 83%-y benzın men otynnyń joǵary baǵasyna alańdaıdy.

Zertteýge sáıkes, 46%-y prezıdent Baıden energetıkalyq saıasatta nashar jumys istedi dep sanaıdy, al 38% bul saıasatty jaqsy nemese joǵary dep baǵalap otyr.

Foto: images.squarespace-cdn.com