Amerıkalyqtardyń Qazaqstanda túsirilgen telehıkaıasy jeltoqsanda kórsetiledi - VIDEO
ASTANA. QazAqparat - 12 jeltoqsanda «Marko Polo» telehıkaıasynyń premerasy bolady dep kózdelgen. Ony Qazaqstanda túsirgen, dep jazady Forbes.kz.
10 serııalyq «Marko Polo» kartınasyn aǵaıyndy prodıýserler Harvı jáne Bob Vaınshteınder - Miramax jáne Weinstein company stýdııalaryn qalaýshylar túsirdi. Kınony túsirýge amerıkalyq Netflix kompanııasy tapsyrys bergen. Dramada Qytaı aýmaǵynda turǵan 13 ǵasyrdyń venetsııalyq saıahatshy jáne jazýshy Marko Polonyń ómiri jaıly baıandalady.
Qazaqstan tarapynan fılmdi túsirýge jelilik prodıýser Ahat Ibraev pen onyń Adigul family films stýdııasy úlesin qosty. Aıta ketý kerek, amerıkalyqtar Ahatqa seriktes bolý usynysyn ózderi jasaǵan.
«Marko Polo 17 jyl Qubylaı han handyǵynda ómir súrgen. Osy ýaqytta jaılaýda turatyn mońǵoldar, túrki tildi taıpalar týraly jazǵan. Oqıǵa Ortalyq Azııada órbıdi. Sondyqtan Qazaqstanda túsirý sheshimderi oryndy», - dedi Ahat Ibraev.
Qazaqstan tarapynan «Marko Polony» túsirýge 400 adam qatysqan. Prodıýser atap ótkendeı: kıno túsirýshilerge Almaty oblysynyń ákimdigi, QR SІM jáne «Qazaqfılm» járdemdesken.
«Marko Polo» telehıkaıasy 2014 jyldyń jeltoqsan aıynda Soltústik Amerıka, Eýropa jáne Ońtústik-Shyǵys Azııa elderindegi Netflix-ke jazylǵan kórermenderge usynylady. Ahat Ibraev fılm Qazaqstanǵa da jetedi degen pikirde.
