Amerıkalyqtardyń aýzyn ashtyrǵan NLO apparaty týraly pikir ótirik bolyp shyqty
ASTANA. QazAqparat - AQSh-tyń Nıý-Hempshır shtaty Konkord qalasynyń turǵyny aspannan erekshe qubylysty beınekamerasyna túsirip alǵan. Vıdeodan birneshe jaryq núkteler bult arasynan kóringen. Bul beıneni ol áleýmettik jeli arqyly taratyp, sońynda oǵan qatysty ǵalymdardan naqty jaýap aldy, dep jazady 31tv.ru.
Jazba 25 qyrkúıekte jasalǵan. Kelesi kúni ol ǵalamtorda jarııalanyp, paıdalanýshylar ony biraz talqylady. Aspandaǵy erekshe qubylysty jalǵyz ol emes, myńdaǵan amerıkalyq kórgenin aıtyp jatty. Kópshiligi ony ózge planetalyqtardyń ushý apparaty degen bolatyn. Alaıda, ǵalymdar bul fantastıkalyq oı-tujyrymdy joqqa shyǵardy. Sóıtse, bul «qubylys» - Kanaveraldan ushyrǵan «Atlas» zymyran-tasyǵyshy eken. Zymyran ushqanda sońynan kóp mólsherde gaz qaldyryp, kún sáýlesine shaǵylysyp jaryq bolyp kóringen.
