Amerıkalyqtar zombı-apokalıpsıske daıyndalýǵa mindetteldi
ASTANA. QazAqparat - Amerıkanyń Illınoıs shtatynyń parlamenti qabyldaǵan zań jobasyna sáıkes, qazan aıy «zombı shapqynshylyǵyna daıyndyq aıy» retinde resmı túrde bekitildi, dep habarlaıdy QazAqparat Rosbalt agenttigine silteme jasap.
Bul qadam jarnama retinde oılastyrylǵan: tornado, sý tasqyny jáne basqa da tabıǵı apattardyń zombı shapqynshylyǵyna qaraǵanda oryn alý yqtımaldylyǵy joǵary. Alaıda, parlamentarıılerdiń oıynsha, eger Illınoıs turǵyndary tiri ólekselerdiń shabýylyna daıyn bolsa, basqa da apattarǵa ońaı qarsy tura alady.
Zań jobasynda zombılerdiń basty beınesi retinde «Natsııa Z» jáne «Tiri ólikter» (Hodıachıe mertvetsy) serıaldarynyń keıipkerleri alyndy, dep habarlaıdy Tagesanzeiger shveıtsarııalyq gazeti.
Buǵan deıin depýtattar shtat turǵyndarynyń 39%-y ǵana tabıǵı apattarǵa daıyn ekendigin aıtyp, shaǵymdanǵan bolatyn. Sondaı-aq, saıasatkerler shtat turǵyndaryn jergilikti aýa raıy boljamdaryna jazylýǵa shaqyrdy.
