«Amerıkalyqtar qazaqtyń qazy-qartasyna tamsanady»- respýblıkalyq basylymdarǵa sholý
ASTANA. Qazannyń 28-i. /QazAqparat/ - Qazaq aqparat agenttigi respýblıkalyq basylymdarda qazannyń 28-i, sársenbi kúni shyqqan ózekti materıaldarǵa sholýdy usynady.
«Keshe Premer-Mınıstr Kárim Másimovtiń tóraǵalyǵymen Úkimettiń kezekti otyrysy bolyp ótti. Onda Qazaqstanda bıznes júrgizý jaǵdaıyndaǵy sharttar men ruqsattamalar júıesin jeńildetý jáne Nursultan Nazarbaev atyndaǵy Jańa ýnıversıtettiń strategııasy týraly máseleler qaraldy». «Egemen Qazaqstan» basylymynyń búgingi sanyndaǵy «Halyqaralyq standarttarǵa saı strategııa» taqyrybymen berilgen maqala atalmysh bas qosýǵa toqtalypty.
«Egemen Qazaqstan» Syr óńirinde burynǵydan da kóbirek taraıtyn boldy»,- dep jazǵan atalmysh basylymdaǵy kelesi maqala «El ataýyn alyp, aıdaryn taqqan» degen taqyryppen basylymnyń 90 jyldyq torqaly toıy men baspasózge jazylý naýqany kezinde el aralap, gazet oqyrmandarymen dıdarlasyp, olarmen ashyq áńgimelesýdi maqsat tutqan «Egemen Qazaqstan» respýblıkalyq gazeti» AQ Prezıdenti Saýytbek Abdrahmanovtyń syr boıyndaǵy is-saparyna nazar aýdarypty.
Sondaı-aq osy basylymnyń «Tulǵa» aıdarynan oryn alǵan Dúkenbaı Dosjannyń «Fılosof» atty maqalasy belgili jýrnalıst, fılosof Ábdesh Sársenuly Qalmyrzaev týraly syr shertedi.
***
«Keshe Astanada bizdiń aımaqtaǵy eń alǵashqy METRO Cash and Carry áıgili halyqaralyq kóterme saýda jelisiniń ortalyǵy ashyldy. Ashylý resimine deıin birneshe saǵat qalǵanda, ony el Prezıdenti Nursultan Nazarbaev kelip kórdi». 13 myń azyq-túliktik jáne 12 myń azyq-túliktik emes ónim túri satylatyn áıgili «Metro» jaıly tolyǵyraq bilgińiz kelse, «Aıqyn» gazetiniń búgingi sanyndaǵy «Astanada «Metro» ashyldy» degen maqalaǵa nazar aýdaryńyz.
«Nazarbaevty tatarlar óziniń týǵan baýyryndaı jaqsy kóredi», - dep jazdy «Aıqyn» gazetiniń arnaýly tilshisi Máskeýden bergen habarynda. Osy taqyryppen berilgen atalmysh basylymdaǵy kelesi maqala Senat Tóraǵasy Qasym-Jomart Toqaev Reseı múftıler keńesiniń tóraǵasy, múftı sheıh Ravıl Gaınýtdın myrzamen kezdeskeni týraly jazdy.
Sondaq-aq «Aıqyn» gazetiniń kúndelikti «Aq sóıle» aıdary «Qazaq jýrnalıstıkasy ulttyq partııanyń rólin atqarýda» degen taqyryppen «Nur Otan» partııasynyń hatshysy Erlan Qarınmen bolǵan suhbatyn jarııalady. Suhbat qoǵamdaǵy ózekti máseleler tóńireginde oı órbitedi.
«Amerıkalyqtar qazaqtyń qazy-qartasyna tamsanady», - deıdi AQSh-tyń Sıetl qalasynda turatyn qazaqstandyq sýretshi-gobelenshi Láıla Ahmet Osman. Shetelde turatyn qylqalam sheberimen oı bóliskińiz kelse, atalmysh basylymnyń «Rýhanııat» betindegi suhbatqa nazar aýdaryńyz.
***
Bilim jáne ǵylym mınıstrligi Astananyń jańa ýnıversıtetiniń damý strategııasyn tanystyrdy, dep jazady «Kazahstanskaıa pravda». Memleket basshysy Astanada jańa zertteý ýnıversıtetin qurý jobasynyń mańyzyn joǵary baǵalady. Zamanaýı ǵylymı ortalyqtyń paıda bolýyn kózdeıtin bul strategııa keshe Premer-Mınıstr Kárim Másimovtyń tóraǵalyǵyymen ótken Úkimet otyrysynda tanystyryldy. Atalmysh joǵary oqý ornynyń resmı ashylýy kelesi jyly - Qazaqstannyń bas qalasynyń týǵan kúnine josparlanyp otyr.
***
QR Úkimeti eksport pen ımportty lıtsenzııalaý boıynsha 348 ruqsat etý protsedýrasyn alyp tastaýdy usynyp otyr. «Lıter» basylymynyń jazýynsha, Úkimet osy arqyly otandyq kásipkerlerdiń ómirin jeńildetip, ınvestıtsııalyq tartymdylyqty kóterýdi jáne meıilinshe qolaıly bıznes-ahýal qalyptastyrýdy kózdep otyr.
