Amerıkalyqtar eBay aýktsıonynda XVII ǵasyrda Qazaqstanda tigilgen álemdegi eń qymbat taqııany satyp jatyr
ASTANA. 14 shilde. QazAqparat - Amerıkalyqtar eBay aýktsıonyna XVII ǵasyrda Qazaqstanda tigilgen álemdegi eń qymbat taqııany satylymǵa shyǵardy.
«Ekspress K» gazetiniń málim etýinshe, baǵaly tastarmen kómkerilgen, birneshe ǵasyrlyq tarıhy bar bas kıimniń bastapqy quny 15,5 myń AQSh dollaryn qurap otyr.
«Qazaqtyń taqııasyn satylymǵa antıkvarıat pen baǵaly tastar boıynsha mamandandyrylǵan Nadine Krakov Collection amerıkalyq dúkeni shyǵardy. Habarlanǵandaı, atalmysh taqııa Qazaqstanda XVII ǵasyrda tigilgen. Ol altyn jiptermen kestelenip, jeti karat qyzǵylt gaýhartaspen, úsh karat laǵylmen, tórt karat jaqut tasymen jáne taza merýertpen bezendirilgen», - dep jazady basylym.
Antıkvarlar satylymdaǵy taqııany «koroldik» dep atap ketken. Alaıda onyń kimge tıesili bolǵany eshkimge de belgisiz bolyp otyr. Kıim-keshek zertteýshilerdiń aıtýynsha, atalmysh tóbeteı aqsúıek adamnyń bas kıimi bolsa kerek. Sarapshylardyń atap ótkenindeı, osyǵan uqsas taqııany XVI ǵasyrda Reseı Imperııasynda Ivan Groznyıdyń úlken uly Dmıtrıı kıgen. Máskeý qalasyndaǵy Arhangel soborynda saqtaýly turǵan patsha ulynyń bas kıimi de laǵyl, jaqut jáne injý áshekeılerimen kómkerilgen.
