Amerıkalyqtar asyrap alǵan ózbek qyzdary ata-anasyn izdep jatyr
NUR-SULTAN. QazAqparat – Amerıkalyqtar asyrap alǵan bir úıdiń qyzdary Ózbekstandaǵy bıologııalyq ata-analaryna izdeý saldy. Bul týraly QazAqparat tilshisine olardyń ápkesi Elızabet Azız aıtty.
«Men Ózbekstanda dúnıege kelgen joqpyn. Biraq ógeı ápkelerim sonda týyp-ósken. Olar ózderiniń týǵan otbasyn izdeıdi. Sharofova Ýmıda Mınavarqyzy 2000 jyldyń 3 shildesinde, al Darhanova Farzonaboný Mınavarqyzy 2003 jyldyń 9 jeltoqsanynda dúnıege kelgen. Ekeýi de Tashkent oblysynan. Ondaǵy mekenjaı: Tashkent oblysynyń Shyrshyq qalasyndaǵy № 1 shaǵyn aýdan, 66 páter. Olar kedeı otbasynan shyqqan. Balalar úıinde turmasa da, bıologııalyq ata-analary sheteldikterdiń asyrap alýyna ruqsat bergen», - deıdi Elızabet Azız.
Ýmıda men Farzonabonýdyń sheshesiniń aty-jóni – Sharapova Saodat Týlkýnovna. Ákeleri – Sharapov Mınavar Darhanovıch. 2007 jyly solardyń kelisimi boıynsha eki qyzdy ózge adamdar asyrap alǵan.
«Bizge eki qyzdyń basqa da ápkeleri bolǵany belgili. Farzonaboný qyzdardyń eń kishisi eken. Qalǵan qyzdar shamamen 6-19 jasta edi. Ókinishke qaraı, qujattarda basqa qyzdardyń esimderi men derekteri kórsetilmegen. Qolymyzda bar málimet osy ǵana. Kez kelgen kómek biz úshin paıdaly bolmaq», - dedi Elızabet Azız.
Eske salsaq, buǵan deıin Elızabet Azızdiń ózi de Qazaqstandaǵy týǵan ákesine izdeý salǵan edi.
