Amerıkalyqtar asyrap alǵan qazaq qyzy bir kezderi ózi panalaǵan balalar úıine keldi
ASTANA. QazAqparat - Amerıkalyqtar asyrap alǵan qazaq qyzy Sábına Astanadaǵy kishkentaı kezinde ózi tárbıelengen balalar úıine kómek berdi, dep habarlaıdy QazAqparat.
Balalar úıiniń tárbıelenýshisi Sábınanyń (qazirgi esimi - Skaılar) nıeti men sábılerge syılaǵan qýanyshy búkil ujymnyń júregin eljiretti.
«9 aı qursaqta kóterip týǵan ana ana ma? Týǵanyndaı qarap, tárbıelep jetkizgen ana ana ma? Bul suraqtyń jaýabyn búgin tapqandaı boldyq. Qalaı deısiz be? Búgin bizge osy balalar úıinde tárbıelenip, óz elinen jyraqqa ketken qyzymyz keldi. Arada qanshama jyldar ótse de, eline degen ystyq mahabbatyn judyryqtaı júregine salyp, saǵynyshpen ósken ortasyna keldi. Sábına (Skaılar) jaı ǵana kelmeı, dostarymen birigip, elime bir paıdam tıse eken degen nıetpen óziniń elge degen mahabbatyn qaıyrymdylyq jobasyn uıymdastyrý arqyly bildirdi. Bul nıeti bárimizdiń júregimizdi eljiretip, kózimizge jas keldi» dep jazady balalar úıiniń baspasóz qyzmeti Instagram paraqshasynda.
Sábına dostarymen birge kıim-keshek satyp, qomaqty kólemde aqsha jınaǵan.
Ol qarajatqa mýzykalyq aspaptar, oıynshyqtar men balanyń damýyna arnalǵan zattar satyp alyp, balalar úıiniń búldirshinderine syıǵa tartty.
«Bul tek Sábınanyń eńbegi emes, osy tusta ony aıalap baqqan, týǵanynan kem etpeı ósirgen jáne týǵan eline jetkizgen anasy Sıýzannyń eńbegi eren. Sábınanyń uıańdyǵy men sulýlyǵy, tárbıesi men ásemdigi bir-birimen úılesim taýyp, anasynyń esimin asqaqtatyp, bergen tárbıesin aqtaǵandaı. Osynshama ultjandylyqqa, mahabbatqa toly eńbekpen tárbıelegen anasyna myń alǵys. Sábınanyń armanyn oryndaýǵa kómektesken dostaryna rızashylyǵymyzdy bildiremiz» deıdi balalar úıiniń ujymy.
