Amerıkalyq jýrnalıst Jánibek Álimhanulynyń sporttyq mansaby týraly jazdy

NUR-SULTAN. QazAqparat – The Ring jýrnalısi Adam Abramovıts qazaqstandyq boksshy Jánibek Álimhanulynyń (12-0, 8 KO) qazirgi jaǵdaıyna qatysty pikir bildirdi, dep habarlaıdy QazAqparat Sports.kz saıtyna silteme jasap.

«Álimhanuly – «ýaqytsha» chempıon. Al amerıkalyq boksshy Andrade burynǵysha tehnıkalyq chempıon, ol tek jaraqat alǵan. Alda kóp nárseni anyqtaý kerek», - dep jazdy Abramovıts Tvıtterde.

Aıta ketsek, Jánibek Álimhanuly mamyrda ekinshi raýndta brıtandyq boksshy Dennı Dıgnýmdy (14-1-1, 8 KO) nokaýtqa túsirip, WBO tujyrymy boıynsha orta salmaqtaǵy «ýaqytsha» álem chempıony atanǵan edi.

Al amerıkalyq Demetrıýs Andradege (31-0, 19 KO) keler bolsaq, ol WBO tolyqqandy chempıony. Andrade brıtandyq Zak Parkermen (22-0, 16 KO) judyryqtasýy tıis edi, biraq olardyń aıqasy amerıkalyqtyń jaraqatyna baılanysty keıinge qaldyryldy. Andradeniń qaı salmaqta – orta nemese sýperorta salmaqta óner kórsetetini belgisiz.

Jýyrda Jánibek Álimhanuly WBA reıtınginiń úzdikter qatarynan shyǵyp qaldy.

Foto: viraltab.news