Amerıkalyq «Valmont Industries» Qazaqstanda aldyńǵy qatarly sýarý júıeleri zaýytyn ashady
NUR-SULTAN. QazAqparat - Qazaqstan Respýblıkasynyń Premer-Mınıstri Asqar Mamın beınekonferentsııa baılanysy rejıminde «Valmont Industries» kompanııasynyń prezıdenti Stıven Kanevskımen kelissóz júrgizdi, dep jazady primeminister.kz.
Taraptar mal sharýashylyǵy, selektsııa, tuqym sharýashylyǵy, tamshylatyp jáne jańbyrlatyp sýarý, agrarlyq ǵylym jáne bilim salalaryndaǵy yntymaqtastyq pen tájirıbe almasý keleshegin talqylady. Kelissóz qorytyndysy boıynsha QR Aýyl sharýashylyǵy mınıstrligi, qazaqstandyq «Kusto Group» kompanııasy jáne amerıkalyq «Valmont Industries» kompanııasy arasynda ınvestıtsııalar týraly kelisimge qol qoıyldy.
Qujat Qazaqstanda demonstratsııalyq fermalar jelisin qurýdy jáne zamanaýı sýarý júıelerin óndiretin jáne aýyl sharýashylyǵy daqyldarynyń ónimdiligin basqaratyn zaýyt salýdy kózdeıdi.
Kásiporynnyń qýattylyǵy jylyna 1 myń «Valley» frontaldy jáne aınalmaly sýarý mashınalaryn quraıdy. Amerıkalyq ırrıgatsııa tehnologııalary ósimdik sharýashylyǵynyń ónimdiligin arttyrýǵa jáne aýyl sharýashylyǵyndaǵy sý shyǵynyn 50-70%-ǵa azaıtýǵa múmkindik beredi. Demonstratsııalyq fermalar jelisin qalyptastyrý sýarý, sý resýrstaryn utymdy paıdalaný, jemshóp óndirý, fermerlerdi oqytý men trenıng ótkizý jáne bilikti kadrlar daıarlaý salasyndaǵy ozyq tehnologııalar transferin qamtamasyz etedi.
«Valmont Industries» kompanııasy – sý ınfraqurylymy nysandaryn basqarý jáne ınvestıtsııasy, sýarmaly eginshilik jáne ırrıgatsııalyq júıeler óndirisi salasyndaǵy álemdik kóshbasshy. Shtab-páteri AQSh-tyń Nebraska shtatyndaǵy Omaha qalasynda 1946 jyly qurylǵan. Kompanııanyń jyldyq aınalymy $2,6 mlrd asady. Úkimet basshysy QR ekonomıkasynyń qarqyndy damyp kele jatqan sektorlarynyń biri AÓK ekenin atap ótti. Bul rette, BUU janyndaǵy Azyq-túlik jáne aýyl sharýashylyǵy uıymynyń (FAO) baǵalaýy boıynsha Qazaqstan aýyl sharýashylyǵy salasyndaǵy áleýeti barynsha joǵary elderdiń bestigine kiredi. «2020 jyldyń qorytyndysy boıynsha aýyl sharýashylyǵynda 5,6%-ǵa turaqty ósim qamtamasyz etildi – bul saladaǵy sońǵy 6 jyldaǵy eń joǵary kórsetkish. AÓK jahandyq azyq-túlik tizbeginde jalǵasyn tapqan irkilis jaǵdaıynda Qazaqstanda ınflıatsııany tejeýdiń negizgi faktoryna aınaldy», — dedi A. Mamın.
Kelissózge Qazaqstan tarapynan Premer-Mınıstrdiń birinshi orynbasary Álıhan Smaıylov, aýyl sharýashylyǵy mınıstri Saparhan Omarov, ulttyq ekonomıka mınıstri Rýslan Dálenov, syrtqy ister mınıstri Muhtar Tileýberdi, AQSh-taǵy QR elshisi Erjan Qazyhanov, «Kusto Group» basshysy Erkin Tátishev, amerıkalyq taraptan AQSh-tyń Qazaqstandaǵy elshisiniń orynbasary Lıng Teodor, «Valmont Irrigation» prezıdenti Lennı Adams jáne «Valmont Industries» vıtse-prezıdenti Djoshýa Dıkson qatysty.
