Amerıkalyq túrmede 43 jyl jalǵyz qamaqta otyryp bostandyqqa shyqty
ASTANA. QazAqparat - Amerıkalyq Albert Výdfoks 43 jyl jalǵyz qamaýda otyrdy, jaqynda ol bostandyqqa shyqty. Bul týraly onyń qorǵaýshysy habarlady.
Osyndaı sot úkimi byltyr jazda jarııalanǵan bolatyn. Sottalýshylar - Albert Výdfoks, Robert Kıng pen German Ýolles «Angolalyq úshtik» degen laqap atpen belgili, dep jazady Bı-Bı-Sı agenttigi.
Úsheýin de sot «qarýly qaraqshylyq jasaǵany» úshin aıypty dep tanyǵan. Olar Lýızıana shtatyndaǵy qatań rejimdegi túrmege qamalǵan bolatyn.
Výdfoks 1972 jyly túrmede búlik shyǵyp, kúzetshi ólimine aıyptalǵan soń jalǵyz qamaqqa alyndy. Kıng 2001 jyly, Ýolles 2013 jyly bostandyqqa shyǵaryldy. Olardyń «úsheýi de jazyqsyz qamaldy» dep qoǵamdyq belsendiler túrmeden bosatýǵa áreket etken edi.
Výdfokstyń qorǵaýshylarynyń aıtýynsha, ol AQSh-ta eń uzaq merzimde kólemi úsh te eki metr kamerda jalǵyz otyryp shyqqan birden bir adam.
