Amerıkalyq telekanal qazaqstandyq sán men mádenıetke qatysty fılm túsirip jatyr
TARAZ. QazAqparat - Amerıkanyń «Fashion News Live» telearnasynyń dırektory Rokko Leo Galıotı Shymkentte ótip jatqan «ASPARA FASHION Week» halyqaralyq sán aptalyǵyna qatysýda, dep habarlaıdy QazAqparat tilshisi.
«Sán - tek kıim ǵana emes, ol - bıznes, ol - týrızm. Meniń telearnam Amerıka, Kanada, Japonııa, Anglııa, Germanııa, Aýstrııa elderinde translıatsııalanady. Meniń telearna prezıdenti retindegi basty mindetim - el mádenıeti men modany búkil álemge pash etý», - deıdi Rokko Leo Galıotı.
Suhbat barysynda amerıkalyq Qazaqstannyń mádenıeti baı el ekenin atap ótti.
«Qazaq halqynyń ulttyq taǵamdary, kıimi, dini men mentalıteti - osynyń bári men úshin sizderdiń, jalpy qazaq eliniń tarıhy men mádenıeti. Meniń Qazaqstanmen alǵashqy tanysýym Shymkent qalasynda ASPARA Fashion Week-ti ótkizip jatqan Aıdarhan Qalıevpen tyǵyz baılanysty. Biz mádenı-tarıhı Túrkistan qalasyna túsirilimge bardyq. Meniń operatorym qalany, meshitterdi túsirdi. Olardy tek syrtynan ǵana túsirdik, óıtkeni ishtegi ǵıbadat etip jatqan adamdarǵa kedergi jasaǵymyz kelmedi. Eń sońynda osy Fashion Week-tiń vıdeosyn montajdaǵan kezde oǵan elińizdiń tamasha fotosýretterin de salamyz. Osy arqyly álemge sán kórmesimen birge Qazaqstandy da tanystyramyz. Men kórermenderimiz Qazaq eli jaıly da bilgenin qalaımyn», - dedi ol.
Eske sala keteıik, Shymkentte ótip jatqan bul sán aptalyǵyna álemniń kóptegen elinen 24 dızaıner qatysyp jatyr. Munda sán salasynan arnaıy shaqyrylǵan sheteldik qonaqtar arasynda Rokko Leo Galıotıden tys, Berlin Fashion Week prezıdenti Katarjına Stefanova, Italıanyń Vogue jáne Elle jýrnaldarynyń ókilderi Anna Mırabella Postolach jáne Adrıanna Dı Lello, gollandııalyq model jáne sán blogeri Sensemıletta Letıtsııa Samter, QHR kıim jáne toqyma qaýymdastyǵynyń prezıdenti Djan Tong Djı, Asian Designer Week-tiń prezıdenti Delfı Robı Ravat, ózbekstandyq «Miss Union» halyqaralyq sán konkýrsynyń dırektory Gúlnár Muhamedova, Asian Fashion Week Europe dırektory Amsterdam Aıdyn Asık, Ýkraına Átirleri gıldııasynyń prezıdenti Vlad Zvarych syndy tanymal adamdar bar.
Avtor: Galına Skrıpnık
