Amerıkalyq saıasattanýshy Nursultan Nazarbaevty álemdik lıderlerge teńedi

ALMATY. QazAqparat - Almatyda QR Tuńǵysh Prezıdenti Nursultan Nazarbaevtyń saıası kóshasshylyq fenomenin zertteýge arnalǵan «Kemeńgerliktiń 30 jyly» atty halyqaralyq ǵylymı konferentsııada sóz sóılegen amerıkalyq saıasattanýshy Arıel Koen QR Tuńǵysh Prezıdenti Elbasy Nursultan Nazarbaevtyń álemdik saıasattaǵy mańyzdy róli týraly aıtty, dep habarlaıdy QazAqparat tilshisi.

«Meniń jobamnyń ataýy «Nursultan Nazarbaev - ult kóshbasshylarynyń qatarynda» dep atalady. Umtylys, harızma, tártip, týǵan halqyna degen mahabbat ult ákelerin biriktiretin qasıetter. AQSh-ta Djordj Vashıngton, Túrkııada Mustafa Kemal Ata Túrik óz ultynyń qamy úshin basyn báıgege tikken tulǵalar.

Izraılde Davıd Ben-Gýrıon, OAR-da Nelson Mandela birneshe ǵasyrlyq ezgiden soń óz elderin memlekettilikke ákeldi. Olar óz ulttyq qundylyqtaryn dáriptedi. Qazaqstan Tuńǵysh Prezıdentiniń boıynda da osyndaı qasıetter kóp. Qarapaıym otbasynan shyqqan Nazarbaev mansaptyń barlyq satysynan ótip, táýelsiz Qazaqstandy basqardy», - dedi Arıel Koen.

Onyń aıtýynsha, Elbasyn halqy kóregendigi úshin qurmetteıdi.

«Qazaqstanda tabys deńgeıi nebári 2 onjyldyqta ortasha deńgeıden joǵarǵy dárejege jetti. Nursultan Nazarbaev bunymen shektelip qalǵan joq. Osy ýaqyttan bastap ol perspektıvalyq qurylymdyq, ınstıtýtsıonaldyq reformalar júrgizip keledi. Jańa astana - Nur-Sultan boı kóterdi. Kópvektorly saıasat qıyn jaǵdaıda turǵan Qazaqstandy jańa belesterge alyp shyǵardy, óziniń ómirsheńdigin kórsetti», - ded ol.

Jıyn barysynda Shanhaı qoǵamdyq ǵylymdar akademııasynyń Reseı jáne Ortalyq Azııany zertteý ortalyǵynyń dırektory Pan Da Ýeı Elbasynyń arqasynda Qazaqstannyń dıplomatııalyq bedeli qalyptasqandyǵyn aıtty.