Amerıkalyq sarbaz Soltústik Koreıaǵa qashyp ketti
AQSh armııasynyń ókili rastaǵandaı, ustalǵan jigit - qatardaǵy jaýynger Trevıs Kıng.
Derekkózge sensek, ol buǵan deıin Ońtústik Koreıadaǵy Kemp Hamfrız tártiptik bóliminde qyzmet etip júrgen jáne qarýly kúshterden bosaý úshin AQSh-qa bara jatqan.
Pasport baqylaýynan ótkennen keıin ol amalyn taýyp qaıta oralǵan.
Sóıtip Soltústik Koreıamen shekaradaǵy demılıtarızatsııalanǵan aımaqqa aparatyn ekskýrsııalyq týrǵa qosylady.
Bul ońtústikkoreıalyqtar men týrıster úshin tartymdy týrıstik oryn sanalady.
Memlekettik departament pen AQSh Qorǵanys mınıstrligi Trevıs Kıngtiń álgi ekskýrsııa kezinde ádeıi, óz erkimen shekaradan ótkenin aıtty.
Alaıda ázirge eshbir mekeme ony áskerden qashty dep málimdegen joq.
Sol ekskýrsııaǵa qatysýshylardyń biri CBS telekompanııasyna bergen suhbatynda sarbazdyń kúlgen kúıi Soltústik Koreıaǵa qashyp ketkenin aıtty.
«Alǵashynda men muny ázil dep oıladym, biraq ol sodan qaıtyp kelmedi. Sol kezde ǵana jigittiń qaljyńdamaǵanyn túsindim», - deıdi ol.
AQSh memlekettik departamentiniń ókili Mettıý Mıller departamenttiń Pentagonmen baılanysta ekenin jáne qajet bolǵan jaǵdaıda kez kelgen kómekti kórsetýge daıyn ekenin aıtty.
Alǵashynda sarbazdyń aty-jóni qupııa saqtaldy, óıtkeni Aq úı áýeli onyń týystaryna habarlaýdy jón kórgen.
Alaıda, kóp uzamaı birneshe aqparattyq agenttik bul adamnyń aty Trevıs Kıng jáne ol AQSh áskeriniń ekinshi klasty qatardaǵy jaýyngeri ekenin jarııalady.
Jýrnalısterdiń «memlekettik departament Soltústik nemese Ońtústik Koreıamen baılanysqa shyqty ma?» degen suraǵyna Mıller «ońtústikkoreıalyqtarmen baılanysta ekenimizge senimdimin» dedi.
Ol memdepartamenttiń Soltústik Koreıamen habarlaspaǵanyn, biraq onyń bilýinshe Pentagonnyń Phenıanmen biraz baılanysy bar ekenin aıtty.
