Amerıkalyq mýzykant Almaty kósheleriniń shýyn ánge qosty
ALMATY. QazAqparat - Amerıkalyq mýzykant Almaty kósheleriniń shýyn ánge qosty, dep habarlaıdy QazAqparat tilshisi.
Belgili mýzykant Fresh Big Mouf (laqap aty) Aaron Hatch Qazaqstanǵa GoViral festıvaline kelgen. Ol bazardaǵy tarazy, kanat joldary, Almaty jeliniń ysyldaǵan dybysyn, taksofon dúńgirsheginiń dybysyn paıdalanǵan.
Kompozıtsııa Beat Scout stılinde jazylǵan.
«Men kúndelikti kórip júrgen zattardan áýen shyǵaramyn. Júk kólikteri, tamaq ishetin oryndar tipti kez kelgen nárseden shyǵarýǵa bolady. Osynyń bárin men ózimniń telefonymda jasaımyn», - dedi Fresh Big Mouf.
Raıhana Mýhlıs almatylyq arý. Bala kezinen mýzykamen áýestengen. Tek bıyldan bastap kásibı túrde aınalysa bastady.
Bıyl qysta ol óziniń birinshi «Navsegda» sınglin shyǵardy. Sonymen qatar, izinshe Feel Me jáne No More sınglderin jazyp shyqty.
17 jasynan Nıý-Iorkte turatyn Raıhana ánderin aǵylshyn tilinde jazyp keledi.
«Meni GoViral Kz jobasyna qatysýǵa shaqyrdy. Sosyn uıymdastyrýshylar Fresh Big Mouf týraly aıtyp, YouTubetaǵy mýzykasyn tanystyrdy. Maǵan onyń jumystary óte unady. Al oǵan da óz kezeginde meniń ánderim unap qalǵan. Ekeýimiz birigip jumys jasaı bastadyq. Aaron ekeýmiz birinshiden ánge kaver nusqa jazdyq. Uzaq izdeýden soń áıteýir Logic ft. Alessia Cara - 1-800-273-8255 kompozıtsııasyn tańdadyq. Bul án Aaronǵa da, meniń tabıǵatyma da de jaqyn boldy», - dedi Raıhana Mýhlıs.
Shyǵarmashylyq jupqa beınebaıandy túsirýge 2 kún ýaqyt ketken.
Mýzyka avtory Aaron ózi bolsa, ánniń sózin Logic ft. Alessia Cara jazǵan.
Arasynda Aaronnyń sózine jazylǵan rep bar.
«Ol Amerıkadan kele salysymen stýdııaǵa baryp án jazdyq. Aaron men onyń operatory Lars óte kóńildi adamdar. Olar maǵan buryn-sońdy men ózim kórmegen jerlerdi kórsetti. Máselen Kóktóbeden qaraǵanda qalanyń kórinisi keremet», - dedi Raıhana Mýhlıs.
Ánshi Raıhan Mýhlıs Jazzystan, Almaty Pop Up Store jáne GoViral Kz jobalaryna qatysqan. Bıyl jazda onyń mýltımedıalyq albomy jaryq kóredi.
