Amerıkalyq mýzyka mamany Dımashtyń ónerine joǵary baǵa berdi
Merı Tsımmer YouTube jelisindegi óziniń jeke arnasynda álemdegi ártúrli ártisterdiń ónerine baǵa berip otyrady. Dımashtyń ónerin baǵalaý jóninde ánshiniń kóptegen jankúıerleri qolqa salǵan kórinedi. Mýzykalyq sarapshy qazaq ánshisiniń shyǵarmashylyǵymen tanys emes eken.
Jattyqtyrýshy óziniń vokaldyq múmkindigi úsh oktavaǵa ǵana jetetinin moıyndaıdy. Al Dımash alty oktavamen erkin án shyrqaı alady.
«Men júzdegen adamǵa án aıtýdy úırettim. Biraq olardyń bir de bireýi bes oktavada án aıta almaıtyn. Shyn máninde, men oqytqan ánshilerdiń barlyǵynyń úsh nemese úsh jarym oktavalyq múmkindikteri bar. Áıgili ánshilerdiń ózi ortasha vokaldyq dıapazonda án shyrqaıdy», - deıdi ol.
Vokal mamany Dımashtyń eń joǵary nota - D8 (segizinshi oktavanyń re notasy) boıynsha án shyrqaı alatyn qabiletine tańdanysyn jasyrmaıdy.
«Mundaı vokaldyq talant ekiniń birine buıyra bermeıdi. Dımash - aıryqsha vokaldyq aýqymnyń sırek kezdesetin ıegeri. Ol sondaı-aq ártúrli stıldi biriktire alatyn keremet sheber»,- dep atap ótti sarapshy.
Dımashtyń ózindik ereksheligi - tenormen, barıton jáne sopranomen án aıta alýynda.
«Ómirimde 4 oktavalyq sopranomen án shyrqaı alatyn bir ǵana óner ıesimen kezdeskenim bar. Adamnyń dybystyq baılanysy mýzykalyq aspapqa uqsas. Іshek uzyn bolǵan saıyn dybys terbelisi soǵurlym jıi. Dımashtyń ádetten tys vokaldyq baılamy bar. Ol, meniń oıymsha, juqa ári keń. Budan bólek, Dımash án aıtý tehnıkasynyń shynaıy sheberi», - dep esepteıdi bloger.
Vokal muǵalimi Dımashtyń osyndaı nátıjelerge qol jetkize alýynyń birden-bir sebebi - klassıkalyq jáne qazirgi zamanǵa saı ándermen óte kóp ýaqyt jumys isteýiniń arqasy dep esepteıdi.
«Tipti, adam biregeı darynmen dúnıege kelse de, daýsymen shyndap jumys istemese, óneri sol kúıi kómilip qalar edi», - dep qorytyndylady Merı Tsımmer.
