Amerıkalyq qyz ózine tap bergen akýlaǵa toıtarys berdi
ASTANA. QazAqparat - Florıda jaǵalaýynda (AQSh) 17 jasar qyz akýla shabýylynan aman qaldy. Bul týraly The Huffington Post basylymy 4 sáýirde habarlady.
Oqıǵa Destın qalasynyń jaǵalaýynda bolǵan. Onda Kentýkkı turǵyny Keıtlın Teılor (Caitlyn Taylor) anasymen jáne dostarymen demalýǵa barǵan. Teńizge túsip, tereńdigi belýardan keletin jerde júzgen qyz ózine qaraı tolqynnyń jaqyndap qalǵanyn baıqaǵan. Delfın dep oılaǵan qyz jaǵaǵa asyqqan.
Alaıda, ol delfın bolmaı shyqty, júzip kelgen akýla Teılordyń aıaǵyna bas salǵan. Akýladan qutylý úshin Teılor onyń tumsyǵynan soqqan. Sonyń arqasynda jyrtqysh balyqtyń jaǵy ashylyp, shegedeı tisteri qadalǵan aıaqty bosatqan.
Akýla tisteri qyz aıaǵynyń alty jerine túırelgen. Dárigerler 80 jerden tigis saldy.
