Amerıkalyq korporatsııa iri jobasyn júzege asyrý úshin Qaraǵandy oblysyn tańdady
ASTANA. QazAqparat - Qaraǵandy oblysynyń ákimi Erlan Qoshanov AQSh ınvestory - AGCO korporatsııasynyń ókili Tomas F. Velkeni qabyldady. Kezdesý barysynda mal ósirý salasyna qatysty aýqymdy jobany iske asyrý máseleleri talqylandy, dep habarlaıdy oblystyq ákimdiktiń baspasóz qyzmeti.
Amerıkalyq kompanııa aımaǵymyzda shoshqa ósirý salasynda Ǵylymı-zertteý genetıkalyq selektsııalyq-gıbrıdtik ortalyq qurýǵa kiristi. Atalmysh jobany iske asyrý Qazaqstanǵa jańa eksporttyq múmkindikter beredi.
Ortalyq qurylysyna Buqar Jyraý aýdanynyń Sheshenqara aýylynyń mańynda 200 gektar jer bóligen. Qazir qarjylandyrý jáne memlekettik qoldaý máseleleri talqylanýda. Joba qymbat turady: onyń quny - 16 mlrd teńgeden asady.
- Úsh jyldyń aralyǵynda biz osy jobany Qazaqstanda júzege asyrýdyń áleýetterin saraptap shyqtyq. Biz genetıkalyq metarıaldy ósirý úshin álem boıynsha túrli lokatsııalardy qarap shyqtyq. Jumys kúshiniń, bos jer telimderiniń bolýy sekildi aspektiler qarastyryldy. Alaıda eń bastysy - jem bazasy turǵysynan shyǵyndardyń tıimdiligi. Jánede bul turǵyda Qazaqstan úlken artyqshylyqtarǵa ıe, - dedi AGCO aǵa vıtse-prezıdenti Tomas F. Velke.
Bıznesmen respýblıkada, onyń ishinde Qaraǵandy oblysynda ınvestıtsııalyq klımat jaǵymdy ekenin atap ótti.
Onyń aıtýynsha, osy sekildi kásiporyndar Vetnam men Fılıppınde bar, jáne dál osyndaı ortalyq salynǵan soń, Qazaqstan da sol eldermen básekelese alady. Shoshqa etin tıimdi eksporttaý naryǵy Qytaı men Reseı bolatynyn anyqtaǵan. Al genetıkalyq materıaldy Eýropadan satyp alý josparlanyp otyr.
Bıznesmen álemdik tehnologııalar men bilimder transfertine basymdylyq jasaıtyndaryna ýáde berdi.
- Biz oblys basshylyǵynan qoldaý taptyq. Birqatar máselelerdi ortalyq deńgeıde sheshý kerek: qarjylandyrý jáne sýbsıdııa alý kezeńderi boıynsha - bul álemdik naryqtaǵy básekelestik turǵysynda mańyzdy. Osy máselelerdi sheshken soń, qurylysty bastaýǵa jarty jyl ýaqyt qajet bolady. Sondaı-aq qurylys jumystarynyń ózi 18 aıǵa sozylady, - dep málimdedi korporatsııa ókili.
Erlan Qoshanov quzyrly mamandarǵa ınvestor jobany sońyna deıin jetkizýine kómek kórsetýin tapsyrdy.
- Bul tek bizdiń oblys úshin ǵana emes, jalpy respýblıkamyz úshin óte tıimdi joba. Jánede biz onyń júzege asyrylýyna qyzyǵýshylyq tanytyp otyrmyz. Qoldaý kórsetip jatyrmyz jáne ári qaraı da járdemdesemiz - ol úshin memlekettik mehanızmder bar, - dep atap ótti aımaq basshysy.
AGCO korporatsııasynyń keńsesi AQSh Illınoıs shtatynyń Assumption qalasynda ornalasqan.
