Amerıkalyq kompanııa ǵaryshqa ushatyn úsh adamnyń esimin jarııalady
«Men eki jasta bolǵanda aspanǵa qarap, bylaı dep oılaýshy edim: «Ol jaqqa qalaı barsam bolady? Biraq men osyndaı múmkindik bolatynyn túsinbedim. Ǵaryshqa Antıgýadan birinshi bolyp barý ǵaryshtyń qoljetimdi ekenin dáleldeıdi», - dedi Keısha Shahaff. Anasy men qyzy kommertsııalyq emes Space for Humanity uıymy úshin 1,7 mıllıon dollar jınaǵan utys oıynyn jeńip aldy. Olar ǵaryshqa ushatyn Karıb teńiziniń alǵashqy turǵyndary bolmaq.
18 jastaǵy Anastasııa Maıers Shotlandııadaǵy Aberdın ýnıversıtetiniń stýdenti, ol fılosofııa men fızıka mamandyǵynda oqyp jatyr. 80 jastaǵy Djon Gýdvın, 1972 jyly Mıýnhendegi kanoede esý olımpıadasynyń qatysýshysy, Parkınson aýrýymen aýyrady.
«Maǵan 2014 jyly Parkınson aýrýy dıagnozy qoıylǵan kezde, ol meniń tolyqqandy ómir súrýime kedergi keltirýine jol bermedim. Bul [ǵaryshqa ushý – red.] qıyndyqtarǵa tap bolǵan adamdardy shabyttandyrady jáne qıyndyq armanǵa jetýge kedergi bolmaý kerektigin kórsetedi», - dedi ol.
Gýdvın – Virgin Galactic-pen ǵaryshqa ushý bıletteriniń alǵashqy ıegerleriniń biri. Virgin Galactic ǵaryshqa ushýǵa 800-ge jýyq bılet satty, onyń 600-i 250 myń dollarǵa jáne taǵy eki júzi 450 myń dollarǵa satyldy.
Kompanııanyń bas nusqaýshysy-astronavt Bet Mozes te bortta bolady. Mozes Virgin Galactic-pen úsh ret ǵaryshqa ushqan jáne 2019 jyly kommertsııalyq ǵarysh kemesinde jolaýshy retinde ǵaryshqa ushqan alǵashqy adam boldy. Galactic 02 degen ataýǵa ıe ushý 10 tamyzǵa josparlanǵan. Virgin Galactic alǵashqy ǵarysh ushyrylymy 29 maýsymda ótti. Ol bir jarym saǵatqa sozyldy. Bortta eki ushqysh pen Virgin Galactic kompanııasynyń astronavt-nusqaýshysynan bólek úsh ıtalııalyq ushqysh ofıtserler boldy. Olar birqatar ǵylymı tájirıbe ótkizdi. Keme eń joǵarǵy ushý núktesine jetkende Italııa Áskerı-áýe kúshiniń 100 jyldyǵyna oraı ulttyq týyn kóterdi.
Bortta týrıster bolmasa da, bul kommertsııalyq reıs edi. Sebebi ofıtserler úshin Italııa qorǵanys mınıstrligi aqsha tóledi.
