Amerıkalyq kollektsıoner Qazaqstanda tirkelgen erekshe kólikti 146 mln teńgege satyp aldy
ASTANA. QazAqparat – Qazaqstannyń memlekettik tirkeý nómiri bar sırek kezdesetin Toyota kóligi AQSh-ta rekordtyq baǵaǵa satyldy, dep habarlaıdy QazAqparat tilshisi.
Motor.ru saıtynyń málimetinshe, eski Toyota Mega Cruiser jol talǵamaıtyn kóligin amerıkalyq kollektsıoner aýktsıon barysynda jańa Lexus LX baǵasynan 3,5 ese qymbatqa alǵan.
1996 jyly shyqqan, 91 myń shaqyrym jol júrgen kóliktiń sý jańa qojaıyny oǵan 310 myń dollar tólegen.
Teńgege shaqsaq, kólik 146 mln teńgeden astam somaǵa baǵalanyp otyr.
Toyota Mega Cruiser — japon armııasy men barlaý qyzmetteri úshin jasalǵan úlken ramaly jol talǵamaıtyn kólik.
Avtokólik 1995-2001 jyldar aralyǵynda Japonııanyń ishki naryǵy úshin shyǵarylǵan.
Tek 150 jer talǵamaıtyn kólik qana jeke tulǵalarǵa arnalǵan.
Qazaqstannan jetkizilgen kóliktiń ereksheligi – rýli oń jaqta. Al Amerıka Mega Cruiser óte sırek kezdesedi, óıtkeni el zańnamasynyń erekshelikterine baılanysty AQSh-qa shyǵarylǵanyna 25 jyldan asqan mashınalardy ǵana shekteýsiz ımporttaýǵa bolady.
Cars and Birds aýktsıonynda satylǵan Mega Cruiser jeke menshik ıelerine arnalyp barynsha baqýat nusqada jasalǵan.
Salonynda artqy kóriniske arnalǵan kamera, teledıdar, tońazytqysh, aýdıojúıe, jylytylatyn oryndyqtar, statsıonarlyq telefon bar.
Al júksalǵyshy bir kisilik orynmen jabdyqtalǵan. Artqy eki bylǵary oryndyq tuǵyrǵa ornatylǵan.
Salmaǵy 2,9 tonna bolatyn 5,1 metrlik jer talǵamaıtyn kóliktiń qýaty 153 attyń kúshine teń 4 tsılındrli 4,1 lıtrlik týrbodızeldi qozǵaltqyshy bar.
Foto: carsandbids.com
