Amerıkalyq Qazaqstannan asyrap alǵan balasynyń týǵan anasyn izdep jatyr
NUR-SULTAN. QazAqparat – Amerıkalyq azamat Qazaqstannan asyrap alǵan balasynyń týǵan áke-sheshesin izdep jatyr, dep habarlaıdy QazAqparat.
Aıta ketsek taıaýda Krısten Demshok atty amerıkalyq azamat Facebook-tegi «Kazakh American Association» tobynda ózi asyrap alǵan balasynyń anasyn izdep júrgenin habarlaǵan edi. Ol kezinde Qazaqstannan eki qyz balany asyrap alǵan.
«Kishi qyzymyzdyń anasymen baılanystamyz. Al nómiri ózgerip ketkendikten úlken qyzymyzdyń ata-anasymen qarym-qatynasty úzip aldyq. Men mekenjaıymdy kórsete alamyn. Sondaı-aq, sóıleserlik aýdarmashyny da taýyp beremin. Áıtse de biz olardyń nómirin tappaı otyrmyz. Bilýimizshe Kóktas degen alys aýdanda turatyn kórinedi. Olardy nómirin taýyp bere alatyn adam bar ma? Qyzymnyń jasy 17-de. Ol áke-sheshesimen sóıleskisi keledi», - dep jazdy Krısten Demshok.
Krısten osydan eki jyl buryn qyz balanyń áke-sheshesi bir ret sóıleskenin aıtady. Kelesi jyly Amerıkaǵa kelip, kórisýdi de josparlaǵan.
Arada birneshe kún ótkennen keıin tanymal prodıýsser Nurtas Adambaı qyz balanyń týystary tabylǵanyn jazdy.
«Krısten Demshoktyń ózi asyrap alǵan balasynyń týǵan sheshesi Sholpan Qanyshkenqyzyn izdep júrgeni týraly jaqynda jazba jarııalanǵan eji. Biz ony taptyq. Sholpannyń nómiri messenger-ge joldandy. Jaýap bermegenine qaraǵanda ol jekege túsken habarlamany oqymaıtyn bolýy kerek. Sholpan Qanyshkenqyzy qyzynyń qońyraýyn kútip otyr», - dep jazady Nurtas Adambaı.
