Amerıkalyq ınvestıtsııa aǵyny eselene tústi – SІM

ASTANA. QazAqparat – AQSh Qazaqstanǵa tikeleı ınvestıtsııa salýda kóshbasshy elderdiń qatarynda tur. Bul jaıynda AQSh-pen yntymaqtastyqty odan ary damytý jónindegi ınvestıtsııalyq dóńgelek ústel otyrysy barysynda Syrtqy ister mınıstriniń orynbasary Almas Aıdarov aıtty, dep habarlaıdy QazAqparat tilshisi.

«Qazaqstan tarapy atynan AQSh mıssııasyn Astanada qarsy alǵanymyzǵa qýanyshtymyz. AQSh Elshiligine, AQSh-tyń Saýda palatasyna, sonymen qatar Bıznes keńeske osynaý is-sharany uıymdastyrǵany úshin rızashylyǵymdy bildirgim keledi. AQSh pen Qazaqstan arasyndaǵy yntymaqtastyqty damytýǵa arnalǵan búgingi «dóńgelek ústel» Prezıdentimiz Qasym-Jomart Toqaevtyń AQSh-qa sapary kezinde bastalǵan syndarly dıalogtyń jalǵasy sanalatyndyǵy qýantady», - dedi Syrtqy ister mınıstriniń orynbasary.

Sonymen qatar ol AQSh Qazaqstanǵa tikeleı ınvestıtsııa salýda kóshbasshy elderdiń qatarynda turǵanyn atap ótti.

«Ótken jyly, pandemııadan keıingi amerıkalyq ınvestıtsııa aǵyny eki esege jýyq artyp, 5,1 mlrd dollardan asyp tústi. Qazaqstan yntymaqtastyqtyń barlyq salasyndaǵy bizdiń kelisimderimizdi kúsheıtýge daıyn ekendigin atap ótkimiz keledi», - dedi Almas Aıdarov.