Amerıkalyq eriktiler aýyl balalaryna aǵylshyn tilin úıretip júr
Amerıkalyq erikti Mırıam Grınfıld Qaraǵandy oblysy, Nura aýdanynyń №3 Kıevka orta mektebiniń oqýshylaryna 1 aıdan beri aǵylshyn tilin úıretip keledi. Qazaqstanǵa kelgenine kóp bolmasa da, aýyl turǵyndarymen dostasyp, oqýshylardyń súıikti muǵalimine aınalyp úlgergen.
Bıyl alǵash ret júzege asqan «English for Jastar» jobasy boıynsha 9 sheteldik jáne 146 qazaqstandyq erikti elimizdiń mektep oqýshylaryna aǵylshyn tilin úıretip, sóıleý daǵdylaryn damytý úshin 2 aıǵa shalǵaı aýyldarǵa attanǵan. Sonyń biri - Amerıkanyń Nıý-Iork qalasynan kelgen Mırıam.
Mırıam balalarǵa tek sabaq úıretip qana qoımaı, aýyldyń qaınaǵan tirshiligine belsene aralasyp júr. Aýyl turǵyndary da ony jıi otbasylyq merekelerge, toıǵa, balyq aýlaýǵa, ekskýrsııalarǵa shaqyryp turady. Aıta ketý kerek, ol áleýmettik jelide de óte belsendi, aýylda ótken ár kúnimen ınternet paraqshasynda dostarymen bólisip turady. Sondaı-aq, ol bos ýaqytyn jergilikti jattyǵý zalynda ıoga jattyqtyrýshysy retinde ótkizedi.
Mırıam ásirese qazaqstandyq oqýshylardyń tártibine dán rıza.
«Oqýshylarym keremet. Óte tárbıeli, bilimge qushtar, sabaqty muqııat tyńdap, kóp nárse úırenýge tyrysady. Kúnde tańerteńnen keshke deıin júzdegen bala qushaqtap, rahmetin aıtady. Men úshin eń úlken jetistik - osy. Aýyl turǵyndary aqjarqyn, ashyq, óte qonaqjaı. Kelesi jyly da kelýge qarsy emespin», - deıdi Mırıam.
Sondaı-aq eriktiler qatarynda Garvard ýnıversıtetiniń stýdenti Kennet Palmer de bar. Ol qazir Qaraǵandy oblysynyń Osakarovka aýdanynda oqýshylarǵa aǵylshyn tilin tegin úıretip júr. Odan ózge eriktiler elimizdiń Túrkistan, Aqmola, Aqtóbe, Soltústik Qazaqstan, Qostanaı, Pavlodar, Almaty oblystarynyń aýyldaryna attanǵan.
