Amerıkalyq eki kompanııa koronavırýsqa qarsy vaktsınany jappaı testileýdi bastady
NЬıÝ-IORK. QazAqparat – Amerıkalyq Moderna jáne Pfizer kompanııalary COVID-19-ǵa qarsy vaktsınalaryn testileýdiń sheshýshi kezeńine kóshti. Tekserý 30 000 eriktige jasalady, dep habarlaıdy QazAqparat Reuters agenttigine silteme jasap.
Sheshýshi kezeńdegi testileý vaktsınanyń qaýipsizdigi men COVID-19-dyń aldyn alatynyn anyqtaýǵa arnalǵan. Eger bári sátti ótse, vaktsına jyldyń aıaǵynda qoldanysqa enýi múmkin.
Dástúrli vaktsına óndirý tásilderimen salystyrǵanda bul vaktsına jyldam daıyndalyp, óndiriletin jańa tehnologııamen jasaldy. RNQ nemese sıntetıkalyq RNQ dánekeri ımmýndyq júıege koronavırýsty tanyp, beıtaraptandyrýdy úıretedi.
Buryn sońdy naryqqa vaktsına shyǵaryp kórmegen Moderna kompanııasy AQSh úkimetinen 1 mıllıard dollar aldy.
Al Pfizer-de AQSh úkimetimen kelisim bar. Eger vaktsınanyń tıimdiligi dáleldense, olar 2 mıllıard dollar turatyn 50 mıllıon vaktsınany satady.
Qazirgi kúni koronavırýsqa qarsy 150-den astam vaktsına túrli jasalý kezeńderinde jáne jıyrmaǵa jýyq vaktsına adamdarǵa salynyp, tekserýden ótip jatyr.
Johnson & Johnson kompanııasy osy aptada klınıkalyq synaqty bastaıdy. Al vaktsınany aýqymdy zertteýdi qyrkúıekte bastaýy múmkin.
Brıtanııalyq dári shyǵarýshy AstraZeneca vaktsınasyn keń kólemdi synaqtan ótkizý bıyl jazda bastalatynyn málimdedi. Bul vaktsına Oksford ýnıversıteti zertteýshilerimen birlesip daıyndalyp jatyr.
Óndirýshiler álemge keń tarap jatqan vırýsty tezirek jeńýge tyrysyp jatyr. Álemde COVID-19-dan 650 000-ǵa jýyq adam qaıtys boldy.
Pfizer-diń málimdeýinshe, synaq sátti ótip, vaktsına qazanda maquldansa, kompanııa jyl sońynda 50 mıllıon naýqasqa eki doza kóleminde vaktsına egedi.
2021 jyldyń sońynda Pfizer 1,3 mıllıard doza alýdy josparlap otyr, al Moderna shamamen 500 nemese 2021 jyldan bastap jylyna 1 mıllıard dozadan alady.
Reuters-tiń habarlaýynsha, osy aptada amerıkalyq bırjadaǵy Moderna aktsııalary 9%-ǵa ósken. Pfizer aktsııalarynyń ósimi 1,6%-dy qurady, al onyń vaktsına jasap shyǵarǵan seriktesi BioNTech aktsııalary 4,2%-ǵa ósti.
