Amerıkalyq basketbolshy Qazaqstan ulttyq quramasynyń namysyn qorǵaıdy
ASTANA. 23 sáýir. QazAqparat - Basketboldan Qazaqstan ulttyq quramasy bir legıonermen tolyqty. Aldaǵy Azııa birinshiliginiń irikteý dodasynda bas komandamyzǵa amerıkandyq oıynshy Djerrı Djonson kómektesetin bolady, dep habarlaıdy alasharena.kz.
«Astana» basketbol klýbynyń amerıkandyq legıoneri Djerrı Djonson Qazaqstan azamattyǵyn qabyldady. Sóıtip, basketboldan Qazaqstan ulttyq quramasyna shaqyrtý aldy. Bul týraly «Astana» qorǵaýshysynyń ózi feısbýktegi jeke paraqshasynda «Jańa qadamǵa basyp, ómirime ózgeris engizgenim úshin keremet sezimdemin. Qazaqstan ulttyq quramasynyń Olımpıada oıyndaryna joldama alýy úshin qolymnan kelgenniń barlyǵyn jasaımyn», - dep jazady.
Djonsonnyń ulttyq quramaǵa shaqyrtylǵanyn Qazaqstan basketbol federatsııasynyń vıtse-prezıdenti Oleg Severgın de rastady. Otandyq baspasózderdiń birine suhbat bergen Severgın «Azııa chempıonatynyń irikteý dodasynda ulttyq quramamyzǵa Djonson kómektesetin bolady. Ras, qujattar áli tolyq rásimdelip bitken joq», - dep ashyp aıtty.
Aıta keteıik, Djerrı «Astanaǵa» deıin Túrkııanyń «Galatasaraı», Lıtvanyń «Letývos Rıtas», Belgııanyń «Sharlerýa», Frantsııanyń «Klermont» syndy klýbtarynda oınaǵan. Al 2011 jyldyń maýsym aıynda serb qorǵaýshysy Branko Tsvetkovıchpen birge elordalyq «Astanamen» kelisimshartqa otyrǵan bolatyn. Aıtpaqshy, osy aıdyń 23-inde Djerrı 31 jasqa tolady.
Negizi, otandyq basketbol federatsııasy aldaryna Azııa chempıonatynda óner kórsetý maqsatyn qoıyp otyr. Osy oraıda, mamyrdyń 6-8-i aralyǵynda Astanada Azııa birinshiliginiń irikteý kezeńi ótedi dep josparlanǵan. Ázirge týrnırge qatysýǵa Ózbekstan men Túrkmenstan quramalary kelisimderin beripti.
