Amerıkalyq BAQ: Los-Andjeleste Almaty ákimdigi men V.Hrapýnov sottasyp jatyr
ALMATY. QazAqparat - Almaty ákimdigi qalanyń burynǵy basshysy Vıktor Hrapýnov memleket menshiginen 300 mln. teńgeni qoldy qyldy degen aıyppen Los-Andjelestegi federaldyq sotqa shaǵym túsirdi. Bul týraly Bloomberg agenttigi habarlady.
Shaǵymdanýshy taraptyń aıtýynsha, jymqyrylǵan qarjy AQSh pen Shveıtsarııadaǵy esepshotqa aýdarylǵan. Eks-ákimniń áıeli men balalary urlanǵan qarjyǵa Los-Andjelesten jyljymaıtyn múlik, atap aıtqanda, Beverlı Hıllzden quny 6,2 mln. dollar bolatyn vılla, Stýdıo-Sıtıden quny 5,7 mln. dollar turatyn turǵyn jaı satyp alyp, lızıng arqyly Rolls Royce, Bentley kólikterin ıemdengen.
«Hrapýnov atalǵan shaǵymǵa birden jaýap bere qoımady. Onyń saıtynda kórsetilgen málimetterge sáıkes, ol Qazaqstannan 2007 jyly emdelý maqsatynda ketken. Ol Qazaqstannyń iri qalasy Almatyny 1997 jyldan 2004 jylǵa deıin basqarǵan», - delingen habarlamada.
Qazir atalǵan is Los-Andjelestegi federaldy sottyń qaraýynda jatyr.
