Amerıkalyq agenttik týrızmdi damytý úshin sharıǵat talaptaryn saqtaý qajet dep esepteıdi
ASTANA. 21 naýryz. QazAqparat - DinarStandard atty amerıkalyq marketıng agenttigi musylmandardyń týrıstik áleýetin 126 mlrd dollarǵa baǵalady.
Bul jaıynda muslim.kz habarlady.
DinarStandard zertteýshileri ıslam týrızminiń alǵa basyp kele jatqanyn aıtyp otyr. Osynaý jaǵymdy qubylysty negizinen munaı qory mol Parsy shyǵanaǵy turǵyndarynyń saıahatqa kóp shyǵatyndyǵymen túsindirýge bolady.
Sonymen qatar, bul úrdis musylmandardyń qarasy kóp Malaızııa sekildi elderde de baıqalyp otyr. Al Eýropa ıslam elderiniń týrısterin tartý jaǵynan aqsap tur. Bul jaıynda Die Welt basylymy habar taratty.
Eýropa elderine musylman týrısterdiń kóp bara bermeıtindigin Robert Djessı esimdi ıslam mamany 2001 jylǵy jaǵdaımen baılanystyrady. «2001 jyldyń qyrkúıek aıynda Nıý-Iorkte bolǵan teraktiden keıin týrısterdiń kóbisi baǵytyn ózgertti: osy ýaqyt aralyǵynda amerıkalyqtar men eýropalyqtar arab elderinen irgesin aýlaq salsa, musylmandardyń AQSh-qa barýy sırektep ketti. Esesine Malaızııa men Túrkııanyń aıy ońynan týyp, bul elderge Parsy shyǵanaǵynan keletin týrısterdiń qatary artty», - dedi Robert Djessı.
Sondaı-aq, ol: «Malaızııa da, Túrkııa da ózderiniń týrıstik salasyna sharıǵat talaptaryna saı ózgerister engizdi. Nemis qonaq úıleriniń qojaıyndaryna da bulardan qalyspaý úshin osyndaı qadamǵa barǵany jón», - dedi.
DinarStandard zertteýshileri musylman týrısterdi tartýdyń ólshemderin anyqtady. Birinshiden, musylmandar otbasymen saıahattaǵandy jón kóredi. Ekinshiden, halal taǵamdardy tutynady. Musylmandar araq-sharap satylmaıtyn qonaq úılerge túskendi qolaıly kóredi. Sonymen birge, musylman týrısterdiń Ramazan aıynda túnde aýqattanýyna jaǵdaı jasalǵan meımanhanalardy tańdaıtyny anyqtaldy.
Eýropalyq qonaq úılerde qasıetti Qurannyń kóshirmeleri men jaınamazdardyń bolýy da musylman týrısterdiń qataryn arttyrýǵa sep bolatynyn aıtyp otyr zertteýshiler.
