Amerıkalyq «911» qyzmetiniń balamasy Astanada jumys isteı bastady

Elordanyń «109» nómirli dıspetcherlik ortalyǵy jumys isteı bastaǵanyna bir aı boldy. Búginde ortalyqqa táýligine 600-ge jýyq qońyraý kelip túsedi, dep habarlaıdy QazAqparat elorda ákimdiginiń medıa-ortalyǵy na silteme jasap.

«Búgingi tańda qaladaǵy ahýaldy jedel baqylaý úshin úsh myń beınekamera ornatylǵan. Solar arqyly barlyq aqparat ortalyqqa túsedi. Jyl sońyna deıin kameralar sanyn on myńǵa deıin jetkizý josparlanǵan. Kameralar qalanyń barlyq buryshtaryn baqylaıdy. Operatordyń mindeti - ahýaldy qadaǵalap otyrý, turǵyndardyń qońyraýlary men shaǵymdaryna jaýap berý. Bul rette suraqtardyń ártúrli bolatynyn aıta ketken jón. Bul - ınfraqurylym, TJ, túsindirý, aqparat berý, taǵy da basqa maǵynada bolýy múmkin. Operatorlar táýlik boıy jumys isteıdi. Olardyń jumysy shtattan tys jaǵdaılardy anyqtaý, quqyq buzýshylyqty boldyrmaý, turǵyndarǵa kómektesý», - deıdi Astana qalasy ákiminiń orynbasary Andreı Lýkın.

Ahýal ortalyǵynda barlyq memlekettik organdardyń ókilderi bolady. Sondyqtan olar qyzmet jumysynyń barynsha tıimdi bolýyn qamtamasyz etedi.

«Memlekettik organ ókilderi ortalyqta turaqty jumys isteıdi. Olar densaýlyq saqtaý, bilim, TÚKSh, qurylys jáne basqa da sala mamandary. Mańyzdylyǵy sol, shtattan tys jaǵdaıǵa nemese ınfraqurylymǵa qatysty qandaı da bir aqparatty alǵan boıda barlyq málimet bizdiń ahýal ortalyǵyndaǵy jaýapty mamandarǵa jetkiziledi. Mysaly, densaýlyq saqtaý basqarmasynan bólim mamany bolady, ol habarlamany alǵan bette ornatylǵan telefon nemese ratsııa baılanysymen vedomstvolyq baǵynyshty mekemelerge tapsyrma beredi. Emhanalarǵa, aýrýhanalarǵa, jedel járdem stantsııalaryna jáne t.b. Olar da tapsyrma alǵan sátten jyldam áreket etedi jáne belgilengen ýaqyt reglamentine saı máseleni joıady», - deıdi Lýkın.

Qala ákimi orynbasarynyń aıtýynsha, erejede atalǵan máselelerdi joıý merzimi de kórsetilgen.

«Eger ashyq lıýk bolsa, bir saǵattyń ishinde qalpyna kelýi tıis. Al, eger basqa qurylys kompanııalarynyń aralasýy qajet bolmasa, aıtalyq, bir jerdiń plıtkasy túsip qalsa, jóndeýge eki saǵat ýaqyt beriledi. Keıde túrli tehnıkalyq sebepterge baılanysty úlgermeı jatamyz. Mysaly, materıaldardy jetkizý ne bolmasa aýystyrý qajet bolsa, biz aryzdanýshyǵa máseleni aıtyp, túsindiremiz», - deıdi ol.

Turǵyndar tarapynan ótinish-talaptardyń basym bóligi kommýnaldyq máselelerge qatysty. Degenmen, túrli jaǵdaılar kezdesip jatady.

«OpenAir» sharasy kezinde bizge balalaryn joǵaltyp alǵandary týraly qyryqqa jýyq habarlama tústi. ıAǵnı, kontsertti tamashalaýǵa kelgen ata-analar balalaryna kóz qyryn salmaǵan. Olar bizdiń kómegimizge júgindi, biz sol jerde júrgen ishki ister organdary, quqyqtyq tártip, eriktiler, arnaıy qyzmettiń mamandary arqyly birden kómekke keldik. Ortalyqtyń operatorlary alty tilde keńes bere alady. Táýlik ishinde ortasha eseppen 600-ge jýyq qońyraý kelip túsedi. Atalǵan qyzmet túrine aldaǵy ýaqytta suranys artýy múmkin», - deıdi ákim orynbasary.