Amerıkalyqtardyń patrıotızminen neni úırenýge bolady — Raýan Kenjehanulynyń paıymy

— Búgingi basty mindet — memlekettilikti nyǵaıtý. Bul — eshqashan toqtamaıtyn protsess. Óıtkeni ekonomıkalyq, gýmanıtarlyq, mádenı jáne aqparattyq sıpattaǵy túrli qaterler, qaýipter men táýekelder bar. Osynyń bárine júıeli túrde tótep berip, olardyń zııandy áserine qarsy turý, sonymen qatar týyndaıtyn múmkindikterdi elimizdiń paıdasy men múddesine saı durys paıdalana bilý — memlekettiń mindeti. Al memleketti quraıtyn memlekettik ınstıtýttar, bıznes, qoǵamdyq uıymdar, azamattyq qoǵam men medıa osy mindetti ózderine ortaq dep tanýy kerek. Bul tek memlekettik júıeniń nemese bıliktiń ǵana mindeti emes, — dedi ol.

Onyń atap ótýinshe, «Qazaqstan» nemese «memleket» degende, tek bılikti ǵana emes, bıznesti, qoǵamdyq uıymdardy, azamattyq qoǵamdy, mádenıet oshaqtaryn da qamtıtyn ortaq jaýapkershilikti túsinýimiz kerek.

— Túptep kelgende, memlekettilikti saqtaý, nyǵaıtý, ony durys tanytý jáne eldiń abyroıyn asqaqtatý — árbir azamattyń mindeti. Qazaqstan azamaty atanyp, kók pasportty alǵannan keıin, qaı jerde júrse de, elimizdiń bedeli men abyroıyna nuqsan keltirmeıtindeı áreket etýi kerek. Ár adam buǵan óziniń isimen, mádenıetimen, júris-turysymen jáne sózimen tikeleı jaýapty. Bara-bara azamattyq qoǵamymyz da osy túsinikke keledi dep oılaımyn. Sondyqtan qazirgi kezeńdegi mańyzdy mindetterdiń biri — qoǵam men memleketti memlekettilik ıdeıasynyń tóńiregine uıystyrý. Menińshe, patrıotızmdi qalyptastyrý degenimiz — osy, — dedi Raýan Kenjehanuly.

Osy oraıda ol amerıkalyqtardyń patrıotızmin mysalǵa keltirdi.

— Ár úıdiń aldynda tý turady, olar qaı jerde júrse de, Amerıka týraly úlken maqtanyshpen aıtady. Amerıka jaıynda birdeńe aıta bastasań, «Baıqap sóıleńiz, ol — meniń Otanym» dep birden eskertý jasaıdy. Sportta bolsyn, mádenıette bolsyn, azamattardyń óz elin kemsitip sóılegenin nemese oǵan narazylyǵyn ashyq bildirgenin óte sırek kezdestiresiń. Tipti, osyndaı pikir aıtylǵan kúnniń ózinde, aınalasyndaǵy adamdardyń sol kisige degen qurmeti azaıyp, oǵan degen qyzyǵýshylyǵy men tartymdylyǵy tómendeıtinin baıqaýǵa bolady. Osyndaı máselelerdi biz de ashyq aıtyp, memlekettiligi nyǵaıyp, tuǵyry bıiktegen Qazaqstannyń azamattaryn tárbıeleýge basa mán berýimiz kerek. Azamattarymyzdy Qazaqstannyń ókili retinde qaı jerde qalaı áreket etýge, óz eliniń mádenıetimen, ádebıetimen jáne tarıhymen qalaı maqtanýǵa bolatynyn túsinetindeı etip tárbıeleýimiz qajet. Ol úshin tıisti jaǵdaı jasaýymyz kerek, — dedi ol.

Buǵan deıin Raýan Kenjehanuly Respýblıka men Táýelsizdik kúnderiniń aıyrmashylyǵy nede ekenin túsindirip berdi.