Amerıkalyqtar qazaq áskerıleriniń shydamdylyǵyna tań qaldy
ASTANA. KAZINFORM — Qazaqstandyq áskerı qyzmetshi AQSh-tyń Arızona shtatynda rekord ornatqan edi.
Jyl saıyn ótetin Best Warrior baıqaýyna qatysqan qos áskerı Kazinform tilshisine suhbat berip, jarystan jınaǵan tájirıbelerimen bólisti.
Kemp Navaho áskerı bazasynda uıymdastyrylǵan básekede Qazaqstannyń namysyn 54835-A áskerı bólimi batalonynyń 3-synypty serjanty Darhan Aslan men 18404 áskerı bólimi rotasynyń 3-synypty gvardııa serjanty Raýan Toqtarbekov qorǵaǵan edi. 800 metr qashyqtyqty 2 mınýt 5 sekýndta júgirip ótip, rekord ornatqan Darhan Aslan bul jarysqa daıyndalý asa qıynǵa túspegenin aıtady.
— Biz áskerı qyzmetker bolǵandyqtan, júgirý — bizdiń kúndelikti isteıtin jumysymyz. Al ózge jarys túrlerine biz 1 aıdaı daıyndaldyq. Óıtkeni AQSh áskerıleriniń fızıkalyq normatıvteri bizdikine qaraǵanda ózgesheleý. Sol sebepti olardyń normatıvterine saı jattyǵýlaryna kóbirek daıyndaldyq. Іrikteýden ótkennen keıin 1 aıdan keıin osy jarysqa baratynymyzdy aıtty. Sol sátten-aq ózimizdi moraldyq turǵydan daıyndadyq. Elimizdiń namysyn qorǵaý kerek boldy. Qarýlas dosymyz ekeýimiz bir-birimizben tájirıbe almasyp, 10 kún qalǵanda birge daıyndaldyq, — deıdi 3-synypty serjant.
Al máre syzyǵyn otandasynan 5 sekýndqa keshigip kesken Raýan Toqtarbekov saıysty ekinshi bolyp aıaqtaǵan. Osylaısha, qazaqstandyq qos jaýynger shashasyna shań juqtyrmaı, qarsylastaryn basyp ozdy. 18404 áskerı bólimi rotasynyń 3-synypty gvardııa serjanty bıylǵy jarystyń erekshe bolǵanyn aıtady.
— Bul baıqaýdyń basty maqsaty — eki eldiń yntymaqtastyǵyn nyǵaıtyp, tájirıbe almasý. Buǵan deıin AQSh-tyń Arızona shtaty men bizdiń Qazaqstan Qarýly Kúshteriniń arasynda bul jarys jyl saıyn uıymdastyrylatyn. Biraq bıyl erekshe kúrdeli bolyp ótti. Sebebi bizden bólek taǵy 5 memleket pen AQSh-tyń 7 shtaty baq synady. Jarys ózge elde bolsa da, bul bizge asa qatty áser ete qoıǵan joq. Ózge eldiń áskerıleri bizdiń shydamdylyǵymyzǵa tánti boldy, — deıdi Raýan Toqtarbekov.
Áskerıler elimizde turaqty túrde ótetin «Ásker tarlany» saıysynyń byltyrǵy úzdikteri. Solaı, olar Best Warrior baıqaýyna qatysyp, tájirıbe almasý múmkindigine ıe boldy. Sarbazdar qos eldiń áskerılerdi daıyndaýda ózindik erekshelikteri bar ekenin aıtady.
— Ol jaqta kóbinese jaqyn qashyqtyqta baq synaıdy. Kúshtik jattyǵýlarǵa basymdyq berilip, fızıkalyq turǵyda óte kóp mashyqtanady eken. Biraq ondaı jattyǵýlar bizde de qoldanylady. Degenmen tájirıbede olar sekildi jıi paıdalanbaımyz. Tájirıbe almasý barysynda olar bizdiń tózimdiligimizdi nazaryna aldy dep oılaımyn. Sebebi bizdiń normatıvterimizdiń basym bóligi shydamdylyqqa úıretedi, — deıdi olar.
Qazaqstandyq jaýyngerler ózge eldiń áskerılerin shydamdylyǵymen tánti etip te úlgeripti.
— Olar kóbinese kúshti qajet etetin jattyǵýlardy oryndaıdy. Al biz shydamdylyqqa daǵdylanamyz. Olar bizdiń dene bitimimizge qaraıdy. Biz olar sekildi emespiz. Biraq jattyǵýǵa kelgende ekeýimiz jaqsy nátıje kórsetemiz. Olar sony kórip, «sender qalaı daıyndalasyńdar?» dep tań qalady, — deıdi Darhan Aslan.