Amerıkalyq jýrnalıst US Open fınalynda Rybakına jeńiske jetedi dep boljady
ASTANA. KAZINFORM — Amerıkalyq SBNation.com jýrnalısi Olıver Foks Elena Rybakınanyń (WTA reıtınginde 2-oryn) US Open-2026 týrnıriniń fınalynda Arına Sobolenkony (2-oryn) jeńetinine senimdi, dep jazady Sports.kz.
— Sońǵy ýaqytta Rybakına jeńiske jetýdiń óz formýlasyn tapqandaı. Ol birinshi doptan keıingi utystardyń 70 paıyzdan astamyn óz paıdasyna sheship, sonymen qatar eısterdi óte kóp jasaıdy. Al qabyldaý kórsetkishi boıynsha Rybakına da, Sobolenko da týrnırdegi ortasha deńgeıge jaqyn. Degenmen ekeýi de WTA-daǵy Lında Noskovamen birge eń myqty dop berýshilerdiń qatarynda. Ásirese qarsylastaryna breık jasaý múmkindigin barynsha az berýge sheber. Bul kórsetkish boıynsha olar týrdaǵy úzdik nátıjege ıe: óz dop berý kezindegi bir geımde nebári 2,3 upaıdan utylady, — dep jazdy sheteldik jýrnalıst.
Sondaı-aq ol Sobolenko áli de jan-jaqty ári qaýipti oıynshy ekenin atap ótken.
— Ol bıylǵy matchtarynyń 80 paıyzdan astamyn jeńdi. Ádette dál osy kórsetkish naǵyz úzdikterdi áli sol deńgeıge jetýge talpynyp júrgenderden ajyratady. Alaıda, bálkim, bul ǵylymı turǵydan dáleldengen ýáj emes shyǵar, biraq bıylǵy jyl Rybakınaǵa tıesili sekildi sezim bar. Ol óte myqty qarsylastarǵa qarsy keremet tennıs kórsetip júr. Onyń oıynǵa degen kózqarasy, psıhologııalyq daıyndyǵy men alańdaǵy barynsha joǵary shoǵyrlanýy meni erekshe tańǵaldyrady, — deıdi Olıver Foks.
Amerıkalyq jýrnalıstiń aıtýynsha, Sobolenko Elenamen sońǵy kezdesýlerindegi tórt sette qatarynan jeńiske jetkenine qaramastan, bul joly Rybakına jeńedi.
— Muny dáleldeıtin naqty deregim joq, tek chempıondyq deńgeıdegi tennısti ajyrata alatynyma degen ózime degen senimim bar. Qazir Rybakına, qarapaıym tilmen aıtqanda, chempıondyq deńgeıde oınap júr, — dep jazdy Foks.
US Open týrnıriniń Rybakına men Sobolenko arasyndaǵy fınaly 12 qyrkúıekten 13 qyrkúıekke qaraǵan túni ótedi.
Aıta keteıik, buǵan deıin Elena Rybakına US Open-2026 fınalyna shyqqanyn habarlaǵan bolatynbyz.
